పల్నాడులో దారుణం.. ఇంట్లోకి చొరబడి యువకుడి హత్య... చికిత్స పొందుతూ తల్లి కూడా మృతి

ఆంధ్రప్రదేశ్‌లోని పల్నాడు జిల్లాలో దారుణ ఘటన చోటుచేసుకుంది. సత్తెనపల్లి మండలం ధూళిపాళ్ల గ్రామంలో శనివారం దుండగులు ఓ ఇంట్లోకి చొరబడి సాంబశివరావు (36) అనే యువకుడిని కిరాతకంగా నరికి హత్య చేశారు. ఈ దాడిని అడ్డుకునేందుకు ప్రయత్నించిన ఆయన తల్లి కృష్ణకుమారి (55) పై కూడా దుండగులు దాడికి పాల్పడ్డారు. ఈ ఘటనలో ఆమెకు తీవ్ర గాయాలు కాగా, ఆసుపత్రికి తరలించారు. అయితే, చికిత్స పొందుతూ ఆమె కూడా మరణించింది.

వివరాల్లోకి వెళితే, సాంబశివరావు, ఆయన తల్లి ఇంట్లో ఉన్న సమయంలో దుండగులు లోపలికి ప్రవేశించి వారిపై విచక్షణా రహితంగా దాడి చేశారు. ఈ దాడిలో సాంబశివరావు అక్కడికక్కడే మృతి చెందాడు. అనంతరం నిందితులు అక్కడి నుంచి పరారయ్యేందుకు ప్రయత్నించారు.

అయితే, హత్య చేసి పారిపోతున్న నిందితులను సమీపంలోని చాగల్లు గ్రామస్థులు గమనించి, వారిని పట్టుకున్నారు. వెంటనే ఈ సమాచారాన్ని పోలీసులకు అందించారు. ఘటనా స్థలానికి చేరుకున్న పోలీసులు, నిందితులను అదుపులోకి తీసుకున్నారు. కేసు నమోదు చేసి, హత్యకు గల కారణాలపై దర్యాప్తు ప్రారంభించారు.