డబ్ల్యూపీఎల్ తేదీలు ఖరారు... టోర్నీ ఎప్పటి నుంచి అంటే...!

మహిళల ప్రీమియర్ లీగ్ (డబ్ల్యూపీఎల్) 2026 సీజన్‌కు సంబంధించిన వేదికలు, తేదీలు ఖరారయ్యాయి. ఈ టోర్నమెంట్ జనవరి 9 నుంచి ఫిబ్రవరి 5 వరకు నవీ ముంబై, వడోదర నగరాల్లో జరగనుంది. గురువారం నాడు ఢిల్లీలో మెగా వేలం ప్రారంభానికి ముందు డబ్ల్యూపీఎల్ కమిటీ ఛైర్మన్ జయేష్ జార్జ్ ఈ వివరాలను అధికారికంగా ప్రకటించారు.

టోర్నీ ప్రారంభ మ్యాచ్ నవీ ముంబైలోని డీవై పాటిల్ స్టేడియంలో జరగనుండగా, ఫైనల్ పోరుకు వడోదరలోని కోటంబి స్టేడియం ఆతిథ్యం ఇవ్వనుంది. వేలం జరిగే వేదిక వద్ద గురువారం మధ్యాహ్నం సమావేశమైన డబ్ల్యూపీఎల్ కమిటీ, ఈ తేదీలు, వేదికలను ఖరారు చేసినట్లు తెలుస్తోంది. పూర్తి షెడ్యూల్ త్వరలోనే విడుదల కానుంది.

2026లో భారత్, శ్రీలంక సంయుక్తంగా నిర్వహించనున్న పురుషుల టీ20 ప్రపంచకప్‌కు కేవలం రెండు రోజుల ముందు డబ్ల్యూపీఎల్ ఫైనల్ జరగనుండటం గమనార్హం. టోర్నీ రెండో భాగం, నాకౌట్ మ్యాచ్‌లను పూర్తిగా వడోదరలో నిర్వహించడానికి మరో కారణం కూడా ఉంది. జనవరి 11న భారత్, న్యూజిలాండ్ మధ్య జరగనున్న పురుషుల వన్డే మ్యాచ్‌కు కోటంబి స్టేడియం ఆతిథ్యం ఇస్తోంది.

ఇటీవలే భారత మహిళల జట్టు వన్డే ప్రపంచకప్ గెలిచిన తర్వాత జరుగుతున్న తొలి డబ్ల్యూపీఎల్ కావడంతో ఈ సీజన్‌పై భారీ అంచనాలు నెలకొన్నాయి. ప్రస్తుతం ఐదు ఫ్రాంచైజీలు... ముంబై ఇండియన్స్, రాయల్ ఛాలెంజర్స్ బెంగళూరు, ఢిల్లీ క్యాపిటల్స్, యూపీ వారియర్జ్, గుజరాత్ జెయింట్స్ ఫ్రాంచైజీలు మెగా వేలంలో బలమైన జట్లను నిర్మించుకోవడంపై దృష్టి సారించాయి. వేలం టేబుల్ వద్ద ముంబై ఇండియన్స్ తరఫున కెప్టెన్ హర్మన్‌ప్రీత్ కౌర్, ఢిల్లీ క్యాపిటల్స్ తరఫున సౌరవ్ గంగూలీ వంటి ప్రముఖులు హాజరయ్యారు.