India vs South Africa: రెండో టెస్టులో ఓటమి అంచున టీమిండియా.. చారిత్రక సిరీస్ క్లీన్‌స్వీప్‌కు 4 వికెట్ల దూరంలో స‌ఫారీలు

దక్షిణాఫ్రికాతో జరుగుతున్న రెండో టెస్టులో భారత జట్టు ఓటమి అంచున నిలిచింది. ఐదో రోజు ఆటలో టీమిండియా పరాజయాన్ని తప్పించుకునేందుకు తీవ్రంగా పోరాడుతోంది. టీ విరామం తర్వాత ఆరో వికెట్‌ను కూడా కోల్పోయి మరింత కష్టాల్లో పడింది. ప్రస్తుతం రవీంద్ర జడేజా, వాషింగ్టన్ సుందర్ క్రీజులో ఉండగా, చారిత్రక సిరీస్ క్లీన్‌స్వీప్ సాధించేందుకు సఫారీ జట్టుకు కేవలం నాలుగు వికెట్లు మాత్రమే అవసరం.

ఐదో రోజు ఆటలో భాగంగా టీ విరామం అనంతరం 14 పరుగులు చేసిన సాయి సుదర్శన్‌ను సెనురన్ ముత్తుసామి ఔట్ చేయడంతో భారత్ ఆరో వికెట్ కోల్పోయింది. దీంతో జట్టును పరాజయం నుంచి గట్టెక్కించే పూర్తి బాధ్యత ఇప్పుడు జడేజా, సుందర్‌పై పడింది.

అంతకుముందు ఉదయం సెషన్‌లో సఫారీ స్పిన్నర్ సైమన్ హార్మర్ భారత బ్యాటింగ్‌ను కోలుకోలేని దెబ్బ తీశాడు. 27/2 ఓవర్‌నైట్ స్కోరుతో బ్యాటింగ్ ప్రారంభించిన టీమిండియాను హార్మర్ తన స్పిన్‌తో ముప్పుతిప్పలు పెట్టాడు. నైట్ వాచ్‌మన్‌ కుల్దీప్ యాదవ్ (5), ధ్రువ్ జురెల్ (2), కెప్టెన్ రిషభ్ పంత్ (13) వికెట్లను స్వల్ప వ్యవధిలో పడగొట్టాడు. దీంతో భారత జట్టు టీ విరామ సమయానికి 90 పరుగులకే 5 వికెట్లు కోల్పోయి పీకల్లోతు కష్టాల్లో కూరుకుపోయింది. స్పిన్‌ను ఎదుర్కోవడంలో భారత బ్యాటర్లు విఫలమవడంతో దక్షిణాఫ్రికా చారిత్రక విజయం దిశగా అడుగులు వేస్తోంది.