Jogi Ramesh: నకిలీ మద్యం కేసు: జోగి రమేశ్ సోదరుల పోలీస్ కస్టడీకి కోర్టు అనుమతి

నకిలీ మద్యం కేసులో వైసీపీ నేత జోగి రమేశ్, ఆయన సోదరుడు జోగి రాములను నాలుగు రోజుల పాటు పోలీసు కస్టడీకి అప్పగిస్తూ విజయవాడ ఎక్సైజ్ కోర్టు మంగళవారం నాడు ఆదేశాలు జారీ చేసింది. కేసులో మరింత లోతైన దర్యాప్తు కోసం వారిని విచారించాల్సి ఉందని ఎక్సైజ్ అధికారులు దాఖలు చేసిన పిటిషన్‌ను కోర్టు ఆమోదించింది.

ప్రస్తుతం నెల్లూరు సెంట్రల్ జైలులో జ్యుడీషియల్ రిమాండ్‌లో ఉన్న జోగి సోదరులను అధికారులు విచారణ నిమిత్తం అదుపులోకి తీసుకోనున్నారు. కోర్టు ఉత్తర్వుల ప్రకారం, నవంబర్ 26వ తేదీ ఉదయం 10 గంటల నుంచి 29వ తేదీ మధ్యాహ్నం 3 గంటల వరకు కస్టడీ కొనసాగుతుంది. ఈ సమయంలో నకిలీ మద్యం తయారీ, పంపిణీ నెట్‌వర్క్, ఈ వ్యవహారంలో పాలుపంచుకున్న ఇతరుల వివరాలపై అధికారులు ప్రధానంగా దృష్టి సారించనున్నారు.

ఇటీవల జోగి సోదరులకు సంబంధించిన నివాసాల్లో అధికారులు సోదాలు జరిపిన సంగతి తెలిసిందే. ఈ నేపథ్యంలో వారిని అరెస్టు చేశారు.