T20 World Cup 2026: టీ20 వరల్డ్ కప్ షెడ్యూల్ విడుదల... ఫిబ్రవరి 15న భారత్-పాక్ మ్యాచ్

ప్రపంచవ్యాప్తంగా ఉన్న క్రికెట్ అభిమానులు ఎంతో ఆసక్తిగా ఎదురుచూస్తున్న టీ20 ప్రపంచకప్ 2026 షెడ్యూల్‌ను అంతర్జాతీయ క్రికెట్ కౌన్సిల్ (ఐసీసీ) మంగళవారం అధికారికంగా ప్రకటించింది. భారత్, శ్రీలంక దేశాలు సంయుక్తంగా ఆతిథ్యం ఇవ్వనున్న ఈ మెగా టోర్నమెంట్, 2026 ఫిబ్రవరి 7వ తేదీన ప్రారంభమై మార్చి 8న జరిగే ఫైనల్‌తో ముగియనుంది. ఇటీవలే 2024లో ఛాంపియన్‌గా నిలిచిన భారత జట్టు, డిఫెండింగ్ ఛాంపియన్ హోదాలో ఈ టోర్నీలో అడుగుపెట్టనుంది. ఈ టోర్నీలో మొత్తం 20 జట్లు పాల్గొననుండగా, చిరకాల ప్రత్యర్థులైన భారత్, పాకిస్థాన్ జట్లను ఒకే గ్రూప్‌లో చేర్చడం అభిమానుల్లో ఉత్సాహాన్ని రెట్టింపు చేసింది.

కోల్‌కతాలో జరిగిన కార్యక్రమంలో ఐసీసీ ఛైర్మన్ జయ్ షా, 2024 టీ20 ప్రపంచకప్ విజేత కెప్టెన్ రోహిత్ శర్మ, 2025 మహిళల ప్రపంచకప్ గెలిచిన భారత కెప్టెన్ హర్మన్‌ప్రీత్ కౌర్ ఈ షెడ్యూల్‌ను లాంఛనంగా విడుదల చేశారు. ఈ సందర్భంగా వారు మాట్లాడుతూ, ఈ టోర్నమెంట్ క్రికెట్‌కు మరింత ఆదరణ తీసుకువస్తుందని ఆశాభావం వ్యక్తం చేశారు.

టోర్నమెంట్ ఫార్మాట్, గ్రూపుల వివరాలు

ఈ టోర్నమెంట్‌లో పాల్గొనే 20 జట్లను 5 జట్ల చొప్పున మొత్తం 4 గ్రూపులుగా విభజించారు. ప్రతి గ్రూప్‌లో తొలి రెండు స్థానాల్లో నిలిచిన జట్లు ‘సూపర్ ఎయిట్’ దశకు అర్హత సాధిస్తాయి. సూపర్ ఎయిట్‌లో కూడా జట్లను రెండు గ్రూపులుగా విభజించి మ్యాచ్‌లు నిర్వహిస్తారు. ఈ దశలో ప్రతి గ్రూప్‌లోనూ టాప్-2లో నిలిచిన జట్లు సెమీఫైనల్‌కు చేరుకుంటాయి.

ప్రకటించిన వివరాల ప్రకారం... గ్రూప్ ‘ఏ’లో భారత్, పాకిస్థాన్, యూఎస్‌ఏ, నెదర్లాండ్స్, నమీబియా జట్లు ఉన్నాయి. 

గ్రూప్-బి లో మాజీ ఛాంపియన్లు ఆస్ట్రేలియా, శ్రీలంక ఉన్నాయి. వీటితో పాటు జింబాబ్వే, ఐర్లాండ్, ఒమన్ జట్లు కూడా ఇదే గ్రూపులో తలపడనున్నాయి. బలమైన జట్లు ఉండటంతో ఈ గ్రూపు నుంచి తదుపరి దశకు చేరే జట్లపై ఉత్కంఠ నెలకొంది.

గ్రూప్ ‘సి’లో ఇంగ్లండ్, వెస్టిండీస్, బంగ్లాదేశ్, నేపాల్‌తో పాటు చరిత్రలో తొలిసారి ప్రపంచకప్‌కు అర్హత సాధించిన ఇటలీ జట్టు కూడా ఉంది. మిగిలిన గ్రూపుల వివరాలను ఐసీసీ త్వరలో ప్రకటించనుంది.

గ్రూప్-డిలో బలమైన జట్లయిన దక్షిణాఫ్రికా, న్యూజిలాండ్ ఉన్నాయి. ఇటీవలి కాలంలో అద్భుతంగా రాణిస్తున్న ఆఫ్ఘనిస్తాన్ కూడా ఇదే గ్రూపులో ఉండటం గమనార్హం. వీటితో పాటు కెనడా, యునైటెడ్ అరబ్ ఎమిరేట్స్ (యూఏఈ) జట్లు కూడా గ్రూప్-డిలో తమ అదృష్టాన్ని పరీక్షించుకోనున్నాయి.

భారత్ మ్యాచ్‌ల షెడ్యూల్, కీలక వేదికలు

భారత జట్టు తన తొలి మ్యాచ్‌ను ఫిబ్రవరి 7న ముంబైలో యూఎస్‌ఏతో ఆడనుంది. ఆ తర్వాత ఫిబ్రవరి 12న ఢిల్లీలో నమీబియాతో, ఫిబ్రవరి 18న అహ్మదాబాద్‌లోని నరేంద్ర మోదీ స్టేడియంలో నెదర్లాండ్స్‌తో తలపడుతుంది. ఇక అభిమానులు అత్యంత ఆసక్తిగా ఎదురుచూసే భారత్-పాకిస్థాన్ హైవోల్టేజ్ మ్యాచ్ ఫిబ్రవరి 15న శ్రీలంకలోని కొలంబో వేదికగా జరగనుంది. పాకిస్థాన్ ఆడే లీగ్ మ్యాచ్‌లన్నీ భద్రతా కారణాల దృష్ట్యా శ్రీలంకలోని కొలంబో లేదా కాండీ నగరాల్లోనే జరగనున్నాయి.

భారత్ సూపర్ ఎయిట్ దశకు చేరితే అహ్మదాబాద్, చెన్నై, కోల్‌కతాలో మ్యాచ్‌లు ఆడుతుంది. ఒకవేళ సెమీఫైనల్‌కు అర్హత సాధిస్తే ఆ మ్యాచ్ ముంబైలో జరుగుతుంది.

ఫైనల్‌పై ప్రత్యేక నిబంధన

టోర్నమెంట్ ఫైనల్ మ్యాచ్‌కు అహ్మదాబాద్‌లోని నరేంద్ర మోదీ స్టేడియం వేదికగా ఖరారైంది. అయితే, దీనిపై ఐసీసీ ఒక కీలక నిబంధన విధించింది. ఒకవేళ పాకిస్థాన్ జట్టు ఫైనల్‌కు చేరిన పక్షంలో, తుది సమరాన్ని అహ్మదాబాద్ నుంచి కొలంబోకు మారుస్తామని ఐసీసీ స్పష్టం చేసింది. ఈ నిర్ణయం ఇప్పుడు క్రీడా వర్గాల్లో చర్చనీయాంశంగా మారింది. సెమీఫైనల్స్ కోల్‌కతా, ముంబైలో జరగనుండగా, పాకిస్థాన్ లేదా శ్రీలంక సెమీస్‌కు చేరితే వేదికల్లో మార్పులు ఉండవచ్చని తెలుస్తోంది. 2016 తర్వాత భారత్ మళ్లీ టీ20 ప్రపంచకప్‌కు ఆతిథ్యం ఇస్తుండటంతో అభిమానుల్లో భారీ అంచనాలు నెలకొన్నాయి.

ఐసీసీ టీ20 ప్రపంచకప్ 2026 షెడ్యూల్

గ్రూప్ స్టేజ్ మ్యాచ్‌ల పూర్తి వివరాలు

* ఫిబ్రవరి 7 (ఉదయం 11:00): పాకిస్థాన్ vs నెదర్లాండ్స్ (కొలంబో)
* ఫిబ్రవరి 7 (మధ్యాహ్నం 3:00): వెస్టిండీస్ vs బంగ్లాదేశ్ (కోల్‌కతా)
* ఫిబ్రవరి 7 (రాత్రి 7:00): ఇండియా vs యూఎస్ఏ (ముంబై)
* ఫిబ్రవరి 8 (ఉదయం 11:00): న్యూజిలాండ్ vs ఆఫ్ఘనిస్థాన్ (చెన్నై)
* ఫిబ్రవరి 8 (మధ్యాహ్నం 3:00): ఇంగ్లండ్ vs నేపాల్ (ముంబై)
* ఫిబ్రవరి 8 (రాత్రి 7:00): శ్రీలంక vs ఐర్లాండ్ (కొలంబో)
* ఫిబ్రవరి 9 (ఉదయం 11:00): బంగ్లాదేశ్ vs ఇటలీ (కోల్‌కతా)
* ఫిబ్రవరి 9 (మధ్యాహ్నం 3:00): జింబాబ్వే vs ఒమాన్ (కొలంబో)
* ఫిబ్రవరి 9 (రాత్రి 7:00): సౌతాఫ్రికా vs కెనడా (అహ్మదాబాద్)
* ఫిబ్రవరి 10 (ఉదయం 11:00): నెదర్లాండ్స్ vs నమీబియా (ఢిల్లీ)
* ఫిబ్రవరి 10 (మధ్యాహ్నం 3:00): న్యూజిలాండ్ vs యూఏఈ (చెన్నై)
* ఫిబ్రవరి 10 (రాత్రి 7:00): పాకిస్థాన్ vs యూఎస్ఏ (కొలంబో)
* ఫిబ్రవరి 11 (ఉదయం 11:00): సౌతాఫ్రికా vs ఆఫ్ఘనిస్థాన్ (అహ్మదాబాద్)
* ఫిబ్రవరి 11 (మధ్యాహ్నం 3:00): ఆస్ట్రేలియా vs ఐర్లాండ్ (కొలంబో)
* ఫిబ్రవరి 11 (రాత్రి 7:00): ఇంగ్లండ్ vs వెస్టిండీస్ (ముంబై)
* ఫిబ్రవరి 12 (ఉదయం 11:00): శ్రీలంక vs ఒమాన్ (క్యాండీ)
* ఫిబ్రవరి 12 (మధ్యాహ్నం 3:00): నేపాల్ vs ఇటలీ (ముంబై)
* ఫిబ్రవరి 12 (రాత్రి 7:00): ఇండియా vs నమీబియా (ఢిల్లీ)
* ఫిబ్రవరి 13 (ఉదయం 11:00): ఆస్ట్రేలియా vs జింబాబ్వే (కొలంబో)
* ఫిబ్రవరి 13 (మధ్యాహ్నం 3:00): కెనడా vs యూఏఈ (ఢిల్లీ)
* ఫిబ్రవరి 13 (రాత్రి 7:00): యూఎస్ఏ vs నెదర్లాండ్స్ (చెన్నై)
* ఫిబ్రవరి 14 (ఉదయం 11:00): ఐర్లాండ్ vs ఒమాన్ (కొలంబో)
* ఫిబ్రవరి 14 (మధ్యాహ్నం 3:00): ఇంగ్లండ్ vs బంగ్లాదేశ్ (కోల్‌కతా)
* ఫిబ్రవరి 14 (రాత్రి 7:00): న్యూజిలాండ్ vs సౌతాఫ్రికా (అహ్మదాబాద్)
* ఫిబ్రవరి 15 (ఉదయం 11:00): వెస్టిండీస్ vs నేపాల్ (ముంబై)
* ఫిబ్రవరి 15 (మధ్యాహ్నం 3:00): యూఎస్ఏ vs నమీబియా (చెన్నై)
* ఫిబ్రవరి 15 (రాత్రి 7:00): ఇండియా vs పాకిస్థాన్ (కొలంబో)
* ఫిబ్రవరి 16 (ఉదయం 11:00): ఆఫ్ఘనిస్థాన్ vs యూఏఈ (ఢిల్లీ)
* ఫిబ్రవరి 16 (మధ్యాహ్నం 3:00): ఇంగ్లండ్ vs ఇటలీ (కోల్‌కతా)
* ఫిబ్రవరి 16 (రాత్రి 7:00): ఆస్ట్రేలియా vs శ్రీలంక (క్యాండీ)
* ఫిబ్రవరి 17 (ఉదయం 11:00): న్యూజిలాండ్ vs కెనడా (చెన్నై)
* ఫిబ్రవరి 17 (మధ్యాహ్నం 3:00): ఐర్లాండ్ vs జింబాబ్వే (క్యాండీ)
* ఫిబ్రవరి 17 (రాత్రి 7:00): బంగ్లాదేశ్ vs నేపాల్ (ముంబై)
* ఫిబ్రవరి 18 (ఉదయం 11:00): సౌతాఫ్రికా vs యూఏఈ (ఢిల్లీ)
* ఫిబ్రవరి 18 (మధ్యాహ్నం 3:00): పాకిస్థాన్ vs నమీబియా (కొలంబో)
* ఫిబ్రవరి 18 (రాత్రి 7:00): ఇండియా vs నెదర్లాండ్స్ (అహ్మదాబాద్)
* ఫిబ్రవరి 19 (ఉదయం 11:00): వెస్టిండీస్ vs ఇటలీ (కోల్‌కతా)
* ఫిబ్రవరి 19 (మధ్యాహ్నం 3:00): శ్రీలంక vs జింబాబ్వే (కొలంబో)
* ఫిబ్రవరి 19 (రాత్రి 7:00): ఆఫ్ఘనిస్థాన్ vs కెనడా (చెన్నై)
* ఫిబ్రవరి 20 (రాత్రి 7:00): ఆస్ట్రేలియా vs ఒమాన్ (క్యాండీ)