మహిళల కబడ్డీ వరల్డ్ కప్ విజేత భారత్

భారత మహిళల కబడ్డీ జట్టు మరోసారి ప్రపంచ ఛాంపియన్‌గా నిలిచింది. ఢాకా వేదికగా జరిగిన మహిళల కబడ్డీ ప్రపంచకప్‌ ఫైనల్‌లో చైనీస్ తైపీ జట్టుపై భారత్ 35–28 తేడాతో అద్భుత విజయం సాధించింది. ఈ గెలుపుతో భారత జట్టు వరుసగా రెండోసారి ప్రపంచకప్ ట్రోఫీని కైవసం చేసుకుని కబడ్డీ క్రీడలో తమ ఆధిపత్యాన్ని చాటుకుంది.

ఈ టోర్నమెంట్ ఆసాంతం భారత జట్టు అద్భుత ఫామ్‌ను కొనసాగించింది. తమ గ్రూప్ మ్యాచ్‌లన్నింటిలోనూ గెలిచి సెమీఫైనల్‌కు చేరుకుంది. సెమీస్‌లో ఇరాన్‌పై 33–21 తేడాతో గెలిచి ఫైనల్‌లో అడుగుపెట్టింది. మరోవైపు, చైనీస్ తైపీ కూడా తమ గ్రూపులో అజేయంగా నిలిచి, సెమీస్‌లో బంగ్లాదేశ్‌ను ఓడించి ఫైనల్‌కు చేరింది.

పుణెరి పల్టన్ హెడ్ కోచ్ అజయ్ ఠాకూర్ మాట్లాడుతూ, "భారత మహిళల జట్టు ప్రపంచకప్‌ను నిలబెట్టుకోవడం గర్వకారణం. ఫైనల్‌ వరకు వారి ఆధిపత్యం చూస్తే, గత కొన్నేళ్లుగా మహిళల కబడ్డీ ఎంతగా అభివృద్ధి చెందిందో అర్థమవుతుంది. బంగ్లాదేశ్‌లో ఈ టోర్నీ జరగడం కబడ్డీకి ప్రపంచవ్యాప్తంగా పెరుగుతున్న ఆదరణకు నిదర్శనం" అని వివరించారు. ఈ టోర్నమెంట్‌లో మొత్తం 11 దేశాలు పాల్గొనడం విశేషం.

ఈ విజయంపై హర్యానా స్టీలర్స్ హెడ్ కోచ్ మన్‌ప్రీత్ సింగ్ స్పందిస్తూ, "మహిళల జట్టు దేశం గర్వపడే ప్రదర్శన ఇచ్చింది. వారి ఆత్మవిశ్వాసం, జట్టుగా ఆడిన తీరు అద్భుతం. ఒక మాజీ క్రీడాకారుడిగా, ఈ స్థాయికి చేరుకోవడం ఎంత కష్టమో నాకు తెలుసు. క్రీడాకారులకు, సిబ్బందికి నా అభినందనలు" అని తెలిపారు.