ఒక రోజు ముందే 'అఖండ 2' సందడి.. పెయిడ్ ప్రీమియర్లకు సన్నాహాలు!

నందమూరి బాలకృష్ణ, దర్శకుడు బోయపాటి శ్రీను కాంబినేషన్‌లో వస్తున్న 'అఖండ 2' చిత్రంపై అంచనాలు భారీగా ఉన్నాయి. డిసెంబర్ 5న ప్రపంచవ్యాప్తంగా విడుదల కానున్న ఈ సినిమా ప్రమోషన్ల వేగాన్ని చిత్ర యూనిట్ పెంచింది. ఇందులో భాగంగా ఈరోజు సాయంత్రం బెంగళూరులో గ్రాండ్‌గా ట్రైలర్‌ను విడుదల చేయనున్నారు. ఇదిలా ఉండగా, సినిమా విడుదలకు సంబంధించి ఓ ఆసక్తికరమైన వార్త టాలీవుడ్ వర్గాల్లో చక్కర్లు కొడుతోంది.

'అఖండ 2' చిత్రాన్ని విడుదల తేదీ కంటే ఒకరోజు ముందుగానే, అంటే డిసెంబర్ 4న పెయిడ్ ప్రీమియర్లు ప్రదర్శించేందుకు మేకర్స్ సన్నాహాలు చేస్తున్నట్లు తెలుస్తోంది. సినిమా కంటెంట్‌పై పూర్తి ధీమాతో ఉన్న నిర్మాతలు ఈ నిర్ణయం తీసుకున్నట్లు సమాచారం. ఇటీవల కాలంలో కొన్ని చిత్రాలు అనుసరిస్తున్న ఈ ట్రెండ్‌ను 'అఖండ 2' కూడా ఫాలో కానుంది. టాక్ బాగుంటే తొలిరోజు వసూళ్లకు ఇది ఎంతగానో దోహదపడుతుంది.

ఈ పెయిడ్ ప్రీమియర్ల కోసం టికెట్ ధరలను పెంచుకునేందుకు ప్రభుత్వ అనుమతులు (జీవో) కూడా పొందే అవకాశం ఉందని ప్రచారం జరుగుతోంది. 14 రీల్స్ ప్లస్ బ్యానర్‌పై రామ్ అచంట, గోపీ అచంట నిర్మిస్తున్న ఈ చిత్రంలో ప్రగ్యా జైస్వాల్, సంయుక్త మీనన్ హీరోయిన్లుగా నటిస్తున్నారు. తమన్ సంగీతం అందిస్తున్న ఈ సీక్వెల్‌పై అభిమానుల్లో, ట్రేడ్ వర్గాల్లో విపరీతమైన ఆసక్తి నెలకొంది. ఇటీవల విడుదలైన ఫస్ట్ గ్లింప్స్ కు కూడా అద్భుతమైన స్పందన లభించిన విషయం తెలిసిందే.