లాంచ్‌కు ముందే iQOO 15 ధర లీక్.. వన్‌ప్లస్‌కు గట్టి పోటీ!

ఐకూ (iQOO) తన కొత్త ఫ్లాగ్‌షిప్ స్మార్ట్‌ఫోన్ iQOO 15ను ఈ నెల 26న భారత్‌లో, ప్రపంచవ్యాప్తంగా విడుదల చేయడానికి సిద్ధమవుతోంది. అయితే, ఈ అధికారిక లాంచ్‌కు కొన్ని రోజుల ముందే ఫోన్ ధర ఆన్‌లైన్‌లో లీక్ అయింది. ప్రముఖ ఈ-కామర్స్ సైట్ అమెజాన్ ఇండియాలో ఈ ఫోన్ ధర, వేరియంట్ల వివరాలు కొద్దిసేపు కనిపించి మాయమైనట్లు సమాచారం.

టిప్‌స్టర్ అభిషేక్ యాదవ్ షేర్ చేసిన వివరాల ప్రకారం.. 12 జీబీ ర్యామ్, 256 జీబీ స్టోరేజ్ వేరియంట్ ధర రూ. 72,999గా, 16 జీబీ ర్యామ్, 512 జీబీ స్టోరేజ్ వేరియంట్ ధర రూ. 79,999గా అమెజాన్ లిస్టింగ్‌లో కనిపించింది. ఈ ఫోన్ ఆల్ఫా, లెజెండ్ అనే రెండు రంగుల్లో లభించనున్నట్లు కూడా తెలిసింది. ఈ ధరలు నిజమైతే iQOO 15 నేరుగా వన్‌ప్లస్ 15తో పోటీ పడనుంది. ఎందుకంటే వన్‌ప్లస్ 15 కూడా దాదాపు అవే ధరలతో మార్కెట్లో ఉంది.

గతేడాది విడుదలైన iQOO 13తో పోలిస్తే ఇది చాలా పెద్ద పెరుగుదల. iQOO 13 బేస్ మోడల్ (12 జీబీ/256జీబీ) రూ. 54,999కే లాంచ్ అయింది. దీన్నిబట్టి చూస్తే, iQOO 15ను ఒక పూర్తిస్థాయి ప్రీమియం ఫోన్‌గా మార్కెట్లోకి తీసుకురావాలని కంపెనీ లక్ష్యంగా పెట్టుకున్నట్లు స్పష్టమవుతోంది.

ఇప్పటికే చైనాలో విడుదలైన ఈ ఫోన్ స్పెసిఫికేషన్ల ఆధారంగా, ఇందులో 6.85-అంగుళాల 2కే శాంసంగ్ అమోలెడ్ డిస్‌ప్లే, 144 Hz రిఫ్రెష్ రేట్‌ ఉండనుంది. క్వాల్‌కామ్ లేటెస్ట్ స్నాప్‌డ్రాగన్ 8 ఎలైట్ జెన్ 5 చిప్‌సెట్‌తో పనిచేస్తుంది. గేమింగ్ కోసం ప్రత్యేకంగా క్యూ3 గేమింగ్ చిప్‌ను కూడా ఇందులో అమర్చినట్లు తెలుస్తోంది. ఈ లీకైన ధరలు నిజమా కాదా అనేది నవంబర్ 26న జరిగే అధికారిక లాంచ్‌లో తేలిపోనుంది.