Sanjay Malhotra: ఆర్బీఐ గవర్నర్ అవ్వాలంటే ఏం చేయాలి?.. విద్యార్థి ప్రశ్నకు సంజయ్ మల్హోత్రా సమాధానం ఇదే!

రిజర్వ్ బ్యాంక్ ఆఫ్ ఇండియా (ఆర్బీఐ) గవర్నర్ సంజయ్ మల్హోత్రా విద్యార్థులకు జీవితానికి సంబంధించిన కీలక సూచనలు చేశారు. ఫలితాల గురించి ఆలోచించకుండా చేసే పనిపై శ్రద్ధ పెట్టాలని, ఇష్టంతో కష్టపడితే విజయం అదే వస్తుందని ఆయన అన్నారు. గురువారం ఢిల్లీలోని ప్రతిష్ఠాత్మక ఢిల్లీ స్కూల్ ఆఫ్ ఎకనామిక్స్‌లో జరిగిన ఒక కార్యక్రమంలో ఆయన విద్యార్థులతో ముచ్చటించారు.

"ఆర్బీఐ గవర్నర్ అవ్వాలంటే కొన్ని చిట్కాలు చెప్పండి" అని ఒక విద్యార్థి అడిగిన ప్రశ్నకు మల్హోత్రా స్పందిస్తూ యాపిల్ సహ వ్యవస్థాపకుడు స్టీవ్ జాబ్స్ మాటలను గుర్తుచేశారు. "భవిష్యత్తును మనం అంచనా వేయలేం. మీ కర్మను మీరు చేయండి. మీ పనిని ఇష్టంతో, కష్టపడి చేయండి. వెనక్కి తిరిగి చూసుకున్నప్పుడే ఎలా ముందుకు వెళ్లాలనేది అర్థమవుతుంది" అని ఆయన వివరించారు. ఇదే ప్రశ్న తాను చదువుకున్న విద్యాసంస్థ ఐఐటీ కాన్పూర్‌కు వెళ్లినప్పుడు కూడా ఎదురైందని ఆయన గుర్తు చేసుకున్నారు.

వీకేఆర్‌వీ రావు స్మారకోపన్యాసం అనంతరం జరిగిన ఈ ముఖాముఖిలో, మల్హోత్రా 'కర్మ' సిద్ధాంతాన్ని విద్యార్థులకు వివరించడం ఇది రెండోసారి. గతంలో జూన్ 23న ఐఐటీ కాన్పూర్ విద్యార్థులతో మాట్లాడుతూ కూడా ఇదే విషయాన్ని ప్రస్తావించారు.

సంజయ్ మల్హోత్రా 1990 బ్యాచ్ రాజస్థాన్ కేడర్ ఐఏఎస్ అధికారి. ఆయన ఐఐటీ కాన్పూర్‌లో ఇంజనీరింగ్, అమెరికాలోని ప్రిన్స్‌టన్ యూనివర్సిటీలో పబ్లిక్ పాలసీలో మాస్టర్స్ పూర్తి చేశారు. ఆర్బీఐ గవర్నర్‌గా బాధ్యతలు చేపట్టక ముందు కేంద్ర ఆర్థిక మంత్రిత్వ శాఖలో రెవెన్యూ కార్యదర్శిగా పనిచేశారు. 2024 డిసెంబర్ 11న ఆర్బీఐ 26వ గవర్నర్‌గా ఆయన పదవీ బాధ్యతలు స్వీకరించారు.