జపాన్ ఫ్యాన్స్‌ను కలిసేందుకు ప్రభాస్.. ఇచ్చిన మాట నిలబెట్టుకుంటున్న డార్లింగ్!

పాన్ ఇండియా స్టార్ ప్రభాస్ తన జపాన్ అభిమానులకు ఇచ్చిన మాటను నిలబెట్టుకునేందుకు సిద్ధమవుతున్నారు. తన సినిమాలకు జపాన్‌లో లభిస్తున్న ఆదరణ నేపథ్యంలో, అక్కడి అభిమానులను స్వయంగా కలిసేందుకు ఆయన వచ్చే నెలలో జపాన్ పర్యటనకు వెళ్లనున్నట్లు తెలుస్తోంది. ఈ పర్యటన కోసం ప్రస్తుతం నటిస్తున్న ‘ఫౌజీ’ సినిమా చిత్రీకరణ నుంచి ఆయన స్వల్ప విరామం తీసుకోనున్నారు.

‘బాహుబలి’ నుంచి ఇటీవల విడుదలైన ‘కల్కి 2898 ఎ.డి’ వరకు ప్రభాస్ చిత్రాలు జపాన్‌లో భారీ విజయాన్ని సాధించాయి. దీంతో అక్కడ ఆయనకు బలమైన అభిమానగణం ఏర్పడింది. నిజానికి ‘కల్కి’ విడుదల సమయంలోనే జపాన్ వెళ్లాలని ప్రభాస్ భావించారు. అయితే, అప్పుడు కాలి గాయంతో బాధపడుతుండటంతో తన పర్యటనను వాయిదా వేసుకున్నారు. త్వరలోనే తప్పకుండా వస్తానని ఓ వీడియో సందేశం ద్వారా అభిమానులకు హామీ ఇచ్చారు.

ఇప్పుడు ఆ వాగ్దానాన్ని నెరవేర్చేందుకు ఆయన సిద్ధమయ్యారు. మరోవైపు, ఈ నెలాఖరులో ప్రభాస్ తన కొత్త సినిమా ‘స్పిరిట్’ను ప్రారంభించనున్నారు. ఈ చిత్రం కోసం ఆయన తన లుక్‌ను మార్చుకునే పనిలో ఉన్నారని సమాచారం. జపాన్ పర్యటన ముగించుకుని తిరిగి వచ్చాక, కొత్త సినిమాల షూటింగ్‌లతో పాటు ‘రాజాసాబ్’ ప్రచార కార్యక్రమాలతో ఆయన బిజీ అవ్వనున్నారు.