విశాఖపట్నం సమీపంలో ఎక్స్‌ప్రెస్ రైలుకు తప్పిన ప్రమాదం

విశాఖపట్నం సమీపంలో టాటానగర్ ఎక్స్‌ప్రెస్ రైలుకు పెను ప్రమాదం తప్పింది. పెందుర్తి రైల్వే స్టేషన్ సమీపంలోకి రాగానే, విద్యుత్ లైన్ పనులు జరుగుతుండగా ఒక కరెంట్ పోల్ ఒక్కసారిగా పక్కకు ఒరిగింది. అదే సమయంలో ఆ ట్రాక్‌పైకి టాటానగర్ ఎక్స్‌ప్రెస్ వస్తుండటంతో, లోకో పైలట్ అప్రమత్తంగా వ్యవహరించి రైలును నిలిపివేశారు. దీంతో పెను ప్రమాదం తప్పింది.

ఈ ఘటనలో విద్యుత్ స్తంభం పక్కకు ఒరిగిపోవడంతో అక్కడ పని చేస్తున్న నలుగురు కార్మికులు గాయపడ్డారు. క్షతగాత్రులను చికిత్స నిమిత్తం ఆసుపత్రికి తరలించారు. వారిలో ఒకరి పరిస్థితి విషమంగా ఉన్నట్లు సమాచారం. ఈ కారణంగా రైళ్ల రాకపోకలకు అంతరాయం ఏర్పడింది. రైల్వే శాఖ వెంటనే స్పందించి పునరుద్ధరణ పనులు చేపట్టింది.