20 ఏళ్లకే పెళ్లి, పిల్లలు: 'జోహో' శ్రీధర్ వెంబు సలహాపై దుమారం

ప్రముఖ టెక్ సంస్థ జోహో (Zoho) సహ వ్యవస్థాపకుడు శ్రీధర్ వెంబు యువతకు ఇచ్చిన సలహా సోషల్ మీడియాలో పెద్ద దుమారానికి దారితీసింది. యువతీయువకులు 20 ఏళ్ల వయసులోనే పెళ్లి చేసుకుని, పిల్లల్ని కనాలని, ఇది సమాజం మరియు మన పూర్వీకుల పట్ల నిర్వర్తించాల్సిన "జనాభా పరమైన విధి" అని ఆయన వ్యాఖ్యానించారు. ఈ పాతకాలపు ఆలోచనలు భవిష్యత్తులో మళ్లీ ప్రాచుర్యం పొందుతాయని తాను విశ్వసిస్తున్నట్లు ఎక్స్ వేదికగా తెలిపారు.

నటుడు రామ్ చరణ్ సతీమణి, అపోలో హాస్పిటల్స్ వైస్-ఛైర్‌పర్సన్ ఉపాసన కొణిదెల చేసిన ఓ పోస్టుకు స్పందనగా శ్రీధర్ వెంబు ఈ వ్యాఖ్యలు చేశారు. ఐఐటీ హైదరాబాద్ విద్యార్థులతో మాట్లాడినప్పుడు, పెళ్లి చేసుకోవడానికి అబ్బాయిలు ఎక్కువగా ఆసక్తి చూపగా, అమ్మాయిలు కెరీర్‌పై ఎక్కువ దృష్టి పెట్టారని ఉపాసన పేర్కొన్నారు.

అయితే, శ్రీధర్ వెంబు సలహాపై నెటిజన్ల నుంచి తీవ్ర వ్యతిరేకత వ్యక్తమైంది. ఇది జనాభా సంక్షోభం కాదని, ఆర్థిక సంక్షోభమని పలువురు వాదించారు. అస్థిరమైన ఆదాయాలు, అధిక పని గంటలు, పెరిగిన జీవన వ్యయాలు, అధిక అద్దెలు వంటి సమస్యల వల్లే యువత పెళ్లి, పిల్లల బాధ్యతలను వాయిదా వేసుకుంటున్నారని అభిప్రాయపడ్డారు. ముఖ్యంగా మహిళలు, 20 ఏళ్లలో పిల్లల్ని కంటే తమ కెరీర్ దెబ్బతింటుందని ఆందోళన వ్యక్తం చేశారు.

ఈ విమర్శలపై స్పందించిన వెంబు, ఆర్థికంగా స్థిరపడిన వారు కూడా పెళ్లి చేసుకోవడం లేదని, కాబట్టి ఇది సాంస్కృతిక సమస్యేనని అన్నారు. జీవితం ఒక పరుగుపందెం కాదని, ఏ వయసులోనైనా రాణించడానికి అవకాశం ఉంటుందని బదులిచ్చారు. కాగా, శ్రీధర్ వెంబు (57) ప్రస్తుతం తన భార్యతో విడాకుల కేసును ఎదుర్కొంటున్నారు. ఆస్తుల పంపకాల విషయంలో ఆయనపై తీవ్ర ఆరోపణలు ఉన్న నేపథ్యంలో, ఆయన ఇలాంటి సలహాలు ఇవ్వడంపై విమర్శలు వెల్లువెత్తుతున్నాయి.