బీహార్ సీఎంగా మళ్లీ నితీశ్ కుమారే ఎందుకు?.. తెర వెనుక కారణాలు ఇవే!

బీహార్ రాజకీయాలు మరోసారి నితీశ్ కుమార్ చుట్టూనే తిరుగుతున్నాయి. ఎన్నికల ఫలితాలు ఎలా ఉన్నా, ముఖ్యమంత్రి పీఠం మాత్రం ఆయనకే దక్కనుందనే సంకేతాలు స్పష్టంగా కనిపిస్తున్నాయి. కేవలం సంఖ్యాబలమే కాకుండా, ఆయనకున్న పరిపాలనా అనుభవం, రాష్ట్ర రాజకీయ పరిస్థితులు, కూటమిలో ఆయనకున్న ఆమోదయోగ్యత వంటి అంశాలు నితీశ్‌ను మళ్లీ ముఖ్యమంత్రి పీఠం వైపు నడిపిస్తున్నాయి.

నవంబర్ 14న అసెంబ్లీ ఎన్నికల ఓట్ల లెక్కింపు రోజున పట్నాలోని జనతాదళ్ (యునైటెడ్) కార్యాలయం వద్ద కనిపించిన దృశ్యాలు ఆసక్తిని రేపాయి. గర్జిస్తున్న పులి చిత్రంతో పాటు "టైగర్ అభీ జిందా హై" (పులి ఇంకా బతికే ఉంది) అనే నినాదంతో నితీశ్ కుమార్ భారీ పోస్టర్లు వెలిశాయి. ఇది కేవలం ఆత్మవిశ్వాసాన్ని ప్రకటించడమే కాకుండా బీహార్ ప్రజలు మరోసారి సుపరిచిత నేతకే పట్టం కట్టారని చెప్పకనే చెప్పింది.

గత రెండు దశాబ్దాలుగా నితీశ్ కుమార్ బీహార్ రాజకీయాల్లో కేంద్ర బిందువుగా ఉన్నారు. ఆయన పార్టీకి పూర్తి మెజారిటీ లేనప్పుడు కూడా ముఖ్యమంత్రిగా బాధ్యతలు చేపట్టారు. రాష్ట్రంలో సుస్థిర పాలన అందించగల నేతగా ఆయనకున్న పేరు ప్రతి ఎన్నికల్లోనూ కలిసి వస్తోంది. ఎన్డీయే కూటమిలో కూడా భాగస్వామ్య పక్షాల మధ్య సమన్వయం సాధించగల ఏకాభిప్రాయ నేతగా నితీశ్‌కు గుర్తింపు ఉంది. బలమైన, ఐక్య ప్రత్యామ్నాయాన్ని చూపడంలో ప్రతిపక్షాలు విఫలం కావడం కూడా ఆయనకు కలిసొచ్చింది.

రోడ్ల నిర్మాణం, విద్యుత్ సరఫరా, మహిళా సాధికారత వంటి పథకాలు ప్రజల మదిలో నితీశ్ పాలనను గుర్తుచేస్తాయి. కొత్త ప్రయోగాల కంటే అనుభవానికే ఓటర్లు, ముఖ్యంగా మహిళలు, గ్రామీణ ప్రజలు మొగ్గు చూపారు. ఈ కారణాలన్నీ కలిసి బీహార్ రాజకీయ ముఖచిత్రం మరోసారి నితీశ్ కుమార్ నాయకత్వంలోనే కొనసాగేలా చేస్తున్నాయి.