రోడ్డు ప్రమాదంలో వెయిట్ లిఫ్టర్ సత్యజ్యోతి దుర్మరణం

రాష్ట్ర స్థాయి పోటీల్లో పతకం సాధించాలని వెళుతున్న ఓ క్రీడాకారిణిని లారీ రూపంలో మృత్యువు కబళించింది. ఈ విషాద ఘటన విజయనగరం జిల్లా కేంద్రంలో శనివారం చోటుచేసుకుంది. రాష్ట్ర స్థాయి వెయిట్‌లిఫ్టింగ్ పోటీల్లో పాల్గొనేందుకు వెళుతుండగా జరిగిన రోడ్డు ప్రమాదంలో వెయిట్‌లిఫ్టర్ తాడుతూరి సత్యజ్యోతి (26) అక్కడికక్కడే మృతి చెందింది.

వివరాల్లోకి వెళితే, నెల్లిమర్ల మండలం కొండవెలగాడ గ్రామానికి చెందిన సత్యజ్యోతి, ఆమె సోదరి సరోజా గాయత్రి ఇద్దరూ వెయిట్‌లిఫ్టింగ్‌లో ఎన్నో పతకాలు సాధించారు. సత్యజ్యోతి ప్రస్తుతం విశాఖపట్నంలోని వాల్తేరు రైల్వే డివిజన్‌లో క్లర్కుగా పనిచేస్తున్నారు. కొండవెలగాడలో జరుగుతున్న రాష్ట్ర స్థాయి వెయిట్‌లిఫ్టింగ్ పోటీల కోసం తన సోదరి గాయత్రితో కలిసి స్కూటీపై బయలుదేరారు.

విజయనగరం పట్టణ సమీపంలోని వైఎస్‌ఆర్ నగర్ దాటిన తర్వాత, ఎదురుగా వేగంగా వస్తున్న ఓ లారీ వీరి స్కూటీని బలంగా ఢీకొట్టింది. ఈ ప్రమాదంలో సత్యజ్యోతి అక్కడికక్కడే ప్రాణాలు కోల్పోగా, ఆమె సోదరి గాయత్రికి స్వల్ప గాయాలయ్యాయి. సమాచారం అందుకున్న టూటౌన్ సీఐ శ్రీనివాసరావు సంఘటనా స్థలానికి చేరుకుని, మృతదేహాన్ని పోస్టుమార్టం నిమిత్తం ప్రభుత్వ ఆసుపత్రికి తరలించారు.

ప్రతిభావంతురాలైన క్రీడాకారిణి అకాల మరణంతో ఆమె స్వగ్రామం కొండవెలగాడలో విషాద ఛాయలు అలుముకున్నాయి. సత్యజ్యోతి మృతి పట్ల శాప్ ఛైర్మన్ రవినాయుడు, జిల్లా కలెక్టర్ రామసుందర్‌రెడ్డి తీవ్ర సంతాపం వ్యక్తం చేశారు.