మహిళల క్రికెట్‌కు పెద్ద పీట.. ఇకపై ప్రపంచకప్‌లో 10 జట్లు

ఐసీసీ బోర్డు సమావేశంలో పలు కీలక నిర్ణయాలకు ఆమోదముద్ర పడింది. ప్రపంచవ్యాప్తంగా క్రికెట్‌ను మరింత విస్తరించడం, మహిళల క్రికెట్‌కు ప్రాధాన్యం పెంచడం, క్రీడ దీర్ఘకాలిక అభివృద్ధికి పటిష్ఠ‌మైన ప్రణాళికలు రూపొందించడం వంటి అంశాలపై బోర్డు సభ్యులు చర్చించి తీర్మానాలు చేశారు. ఈ సమావేశంలో తీసుకున్న నిర్ణయాలు క్రికెట్ భవిష్యత్తుపై గణనీయమైన ప్రభావం చూపనున్నాయి.

2025లో జరిగిన మహిళల వన్డే ప్రపంచకప్‌కు అపూర్వ స్పందన లభించిందని ఐసీసీ వెల్లడించింది. ఈ టోర్నమెంట్‌ను స్టేడియాల్లో దాదాపు 3 లక్షల మంది వీక్షించారు. మహిళల క్రికెట్ చరిత్రలో ఇదే ఆల్‌టైమ్ రికార్డు. ఇక టెలివిజన్, డిజిటల్ మాధ్యమాల్లోనూ ఈ టోర్నీ సరికొత్త రికార్డులు సృష్టించింది. ఒక్క భారతదేశంలోనే దాదాపు 50 కోట్ల మంది ఈ మ్యాచ్‌లను వీక్షించినట్లు ఐసీసీ పేర్కొంది. ఈ నేపథ్యంలో రాబోయే మహిళల వన్డే ప్రపంచకప్‌ను ప్రస్తుతం ఉన్న 8 జట్లకు బదులుగా 10 జట్లతో నిర్వహించాలని బోర్డు నిర్ణయించింది.

అంతర్జాతీయ క్రీడా వేదికలపై క్రికెట్ ఉనికిని బలోపేతం చేసే దిశగా ఐసీసీ చేస్తున్న ప్రయత్నాలు ఫలించాయి. 2028లో జరగనున్న లాస్ ఏంజిల్స్ ఒలింపిక్స్‌లో క్రికెట్‌ను చేర్చడాన్ని బోర్డు ధ్రువీకరించింది. ఈ ఒలింపిక్స్‌లో పురుషుల, మహిళల విభాగాల్లో టీ20 ఫార్మాట్‌లో పోటీలు జరుగుతాయి. ఒక్కో విభాగంలో ఆరు జట్ల చొప్పున పాల్గొంటాయి. దీంతో పాటు 2026 ఆసియా క్రీడలు (జపాన్), 2027 ఆఫ్రికన్ గేమ్స్ (ఈజిప్ట్), 2027 పాన్‌అమ్ గేమ్స్ (పెరూ)లలో కూడా క్రికెట్ ఒక భాగంగా ఉండనుంది.

ఈ సమావేశంలో ఐసీసీ మహిళా క్రికెట్ కమిటీకి కొత్త సభ్యులను నియమించారు. భారత మహిళా క్రికెట్ దిగ్గజం మిథాలీ రాజ్, ప్రస్తుత భారత మహిళల జట్టు కోచ్ అమోల్ ముజుందార్‌లకు ఈ కమిటీలో స్థానం కల్పించారు. వీరితో పాటు యాష్లే డి సిల్వా, బెన్ సాయర్, షార్లెట్ ఎడ్వర్డ్స్, సాలా స్టెల్లా వంటి ప్రముఖులు కూడా సభ్యులుగా నియమితులయ్యారు. అలాగే అసోసియేట్ దేశాల్లో క్రికెట్ అభివృద్ధికి ఊతమిచ్చేందుకు 2026 నుంచి వారికి అందించే నిధులను దాదాపు 10 శాతం పెంచాలని ఐసీసీ బోర్డు నిర్ణయించింది. డిజిటల్ అనుభూతులు, వీడియో గేమింగ్ హక్కులపైనా సమావేశంలో చర్చించారు.