టాలీవుడ్‌ను చూసి బాలీవుడ్ ఎంతో మారాలి: సోనాక్షి సిన్హా

బాలీవుడ్ ప్రముఖ నటి సోనాక్షి సిన్హా 'జటాధర' చిత్రంతో తెలుగు ప్రేక్షకులను పలకరించనున్నారు. ఈ సినిమా ప్రమోషన్లలో భాగంగా ఆమె టాలీవుడ్, బాలీవుడ్ చిత్ర పరిశ్రమల పనివిధానాలపై ఆసక్తికర వ్యాఖ్యలు చేశారు. దక్షిణాది పరిశ్రమలో ఉండే సమయపాలన, క్రమశిక్షణను ప్రశంసించిన ఆమె, ఈ విషయంలో బాలీవుడ్ చాలా నేర్చుకోవాలని సూచించారు.

ఓ ఇంటర్వ్యూలో ఆమె మాట్లాడుతూ, "నేను గతంలో తమిళ, హిందీ భాషల్లో సినిమాలు చేశాను. ఇప్పుడు తెలుగు ప్రేక్షకుల ముందుకు వస్తున్నాను. దక్షిణాది సినీ పరిశ్రమలో కొన్ని విషయాలు నాకు బాగా నచ్చాయి, ముఖ్యంగా ఇక్కడి సమయపాలన అద్భుతం. టాలీవుడ్‌లో ఉదయం 9 గంటలకు షూటింగ్ మొదలైతే సాయంత్రం 6 గంటల కల్లా కచ్చితంగా పూర్తిచేస్తారు. దీనికి ఎంతో క్రమశిక్షణ అవసరం. కానీ హిందీ పరిశ్రమలో ఇలాంటి వాతావరణం ఉండదు. అక్కడ సమయపాలన పాటించరు, అర్ధరాత్రి వరకు షూటింగ్‌లు జరుగుతూనే ఉంటాయి. ఆ పద్ధతి నాకు అస్సలు నచ్చదు. ఈ విషయంలో టాలీవుడ్‌ను చూసి హిందీ వాళ్లు మారాలని కోరుకుంటున్నాను" అని సోనాక్షి సిన్హా స్పష్టం చేశారు.

గతంలో ప్రాంతీయ భాషా చిత్రాల్లో నటించాలని ఆసక్తి ఉన్నప్పటికీ, డేట్లు సర్దుబాటు కాకపోవడం వల్లే కుదరలేదని ఆమె గుర్తుచేసుకున్నారు.

ఇక 'జటాధర' విషయానికొస్తే, ఈ చిత్రంలో నవ దళపతి సుధీర్ బాబు హీరోగా నటిస్తున్నారు. పాన్-ఇండియా ద్విభాషా చిత్రంగా తెరకెక్కిన ఈ సినిమాకు వెంకట్ కళ్యాణ్, అభిషేక్ జైస్వాల్ దర్శకత్వం వహించారు. జీ స్టూడియోస్, ప్రేరణ అరోరా సమర్పణలో ఉమేశ్ కుమార్ బన్సల్, శివిన్ నారంగ్, అరుణ అగర్వాల్ తదితరులు ఈ చిత్రాన్ని నిర్మించారు. ఈ సినిమా నవంబర్ 7న థియేటర్లలో విడుదల కానుంది.