ఫైనల్లో అదరగొట్టిన భారత అమ్మాయిలు... దక్షిణాఫ్రికా టార్గెట్ 299

ఐసీసీ మహిళల ప్రపంచకప్ 2025 ఫైనల్‌లో భారత జట్టు అద్భుతమైన బ్యాటింగ్ ప్రదర్శన కనబరిచింది. నవీ ముంబైలోని డీవై పాటిల్ స్పోర్ట్స్ అకాడమీ వేదికగా దక్షిణాఫ్రికాతో జరుగుతున్న తుదిపోరులో, టీమిండియా నిర్ణీత 50 ఓవర్లలో 7 వికెట్ల నష్టానికి 298 పరుగుల భారీ స్కోరు సాధించింది. దీంతో, దక్షిణాఫ్రికా ముందు 299 పరుగుల కఠినమైన లక్ష్యాన్ని ఉంచింది.

ఈ మ్యాచ్‌లో టాస్ గెలిచిన దక్షిణాఫ్రికా కెప్టెన్ ఫీల్డింగ్ ఎంచుకుంది. బ్యాటింగ్‌కు దిగిన భారత ఓపెనర్లు స్మృతి మంధన, షఫాలీ వర్మ శుభారంభం అందించారు. ముఖ్యంగా షఫాలీ వర్మ (78 బంతుల్లో 87; 7 ఫోర్లు, 2 సిక్సర్లు) తనదైన శైలిలో మెరుపు ఇన్నింగ్స్ ఆడింది. స్మృతి మంధాన (58 బంతుల్లో 45) కూడా రాణించడంతో, తొలి వికెట్‌కు 104 పరుగుల కీలక భాగస్వామ్యం నెలకొల్పారు.

అయితే, ఓపెనర్లు ఔటైన తర్వాత జెమీమా రోడ్రిగ్స్ (24), కెప్టెన్ హర్మన్‌ప్రీత్ కౌర్ (20) త్వరగానే పెవిలియన్ చేరారు. ఈ దశలో క్రీజులోకి వచ్చిన దీప్తి శర్మ (58 బంతుల్లో 58; 3 ఫోర్లు, 1 సిక్స్) బాధ్యతాయుతమైన ఇన్నింగ్స్‌ ఆడి హాఫ్ సెంచరీ పూర్తి చేసుకుంది. చివర్లో వికెట్ కీపర్ రిచా ఘోష్ (24 బంతుల్లో 34; 3 ఫోర్లు, 2 సిక్సర్లు) వేగంగా పరుగులు సాధించి స్కోరు బోర్డును 300 పరుగుల సమీపానికి చేర్చింది. అయితే, ఇన్నింగ్స్ చివరి ఓవర్ ను విసిరిన డి క్లర్క్ పకడ్బందీగా బౌలింగ్ చేయడంతో 6 పరుగులే వచ్చాయి. దాంతో భారత్ 300 మార్కు దాటలేకపోయింది.

దక్షిణాఫ్రికా బౌలర్లలో అయబొంగా ఖాకా మూడు కీలక వికెట్లు పడగొట్టింది. నాన్‌కులెలెకో మ్లాబా, నడైన్ డి క్లర్క్, క్లో ట్రయాన్‌లకు తలో వికెట్ లభించింది. బౌలర్లు కట్టుదిట్టంగా బంతులేసినప్పటికీ, భారత బ్యాటర్లు నిలకడగా పరుగులు రాబట్టడంతో సఫారీ జట్టు ముందు భారీ లక్ష్యం నిలిచింది.