టీమిండియాకు గుడ్ న్యూస్.. ఆసుపత్రి నుంచి శ్రేయస్ అయ్యర్ డిశ్చార్జ్

టీమిండియా అభిమానులకు ఊరటనిచ్చే వార్త. ఆస్ట్రేలియాతో జరిగిన మూడో వన్డేలో తీవ్రంగా గాయపడి ఆసుపత్రిలో చేరిన భారత స్టార్ బ్యాటర్ శ్రేయస్ అయ్యర్, చికిత్స అనంతరం కోలుకున్నారు. ఆయనను సిడ్నీలోని ఆసుపత్రి నుంచి శనివారం డిశ్చార్జ్ చేసినట్లు బీసీసీఐ అధికారికంగా ప్రకటించింది.

అక్టోబర్ 25న సిడ్నీ క్రికెట్ గ్రౌండ్‌లో జరిగిన మ్యాచ్‌లో ఫీల్డింగ్ చేస్తున్న సమయంలో ఒక క్యాచ్ అందుకునే ప్రయత్నంలో బంతి శ్రేయస్ కడుపు భాగానికి బలంగా తగిలింది. ఈ ఘటనలో ఆయన స్ప్లీన్ (ప్లీహం) దెబ్బతిని అంతర్గత రక్తస్రావం అయింది. వెంటనే స్పందించిన వైద్యులు, ఆయన్ను ఆసుపత్రికి తరలించారు.

ఈ విషయంపై బీసీసీఐ ఒక ప్రకటన విడుదల చేసింది. "శ్రేయస్ అయ్యర్‌కు అయిన గాయాన్ని వెంటనే గుర్తించి, ఒక చిన్న వైద్య ప్రక్రియ ద్వారా రక్తస్రావాన్ని విజయవంతంగా అరికట్టాం. ప్రస్తుతం ఆయన ఆరోగ్యం నిలకడగా ఉంది. కోలుకుంటున్న తీరుపై బీసీసీఐ వైద్య బృందంతో పాటు సిడ్నీ, భారత వైద్య నిపుణులు సంతృప్తి వ్యక్తం చేశారు. అందుకే ఆయన్ను ఈరోజు ఆసుపత్రి నుంచి డిశ్చార్జ్ చేశాం" అని బీసీసీఐ పేర్కొంది.

అయితే, ఫాలో-అప్ చికిత్స, వైద్యుల పర్యవేక్షణ కోసం శ్రేయస్ మరికొంత కాలం సిడ్నీలోనే ఉంటారని బీసీసీఐ స్పష్టం చేసింది. ప్రయాణానికి పూర్తిగా ఫిట్‌గా ఉన్నారని నిర్ధారించుకున్న తర్వాతే ఆయన భారత్‌కు తిరిగి వస్తారని తెలిపింది. ఈ కష్ట సమయంలో శ్రేయస్‌కు అత్యుత్తమ వైద్యం అందించిన సిడ్నీ వైద్యులు డాక్టర్ కౌరుశ్ హఘిఘి బృందానికి, భారత్‌లోని డాక్టర్ దిన్షా పార్దివాలాకు బీసీసీఐ ప్రత్యేక కృతజ్ఞతలు తెలియజేసింది.