ఐదేళ్లు శ్రమించి పొలంలో బావి తవ్విన వృద్ధ దంపతులు

మధ్యప్రదేశ్‌కు చెందిన వృద్ధ దంపతులు అకుంఠిత దీక్షకు, ఆత్మవిశ్వాసానికి ప్రతిరూపంగా నిలుస్తున్నారు. ఐదేళ్ల పాటు శ్రమించి, ఎవరి సహాయం లేకుండా తమ చేతులతోనే బావిని తవ్వి అందరికీ ఆదర్శంగా నిలిచారు. టికమ్‌గఢ్‌ జిల్లా, జామునియా ఖేఢా గ్రామానికి చెందిన దీప్‌చంద్‌ ఆదివాసీ (65), ఆయన భార్య గౌరీబాయి ఈ ప్రయత్నం చేశారు.

దీప్‌చంద్‌ దంపతులకు నలుగురు కుమార్తెలు, ఒక కుమారుడు ఉన్నారు. అందరి వివాహాలు చేయడంతో వారి ఆర్థిక పరిస్థితి పూర్తిగా దిగజారింది. దీంతో తమకున్న బంజరు భూమిని సాగులోకి తీసుకురావాలని నిర్ణయించుకున్నారు. ప్రభుత్వ సహాయం కోసం ఎదురుచూడకుండా, సొంతంగానే బావి తవ్వకం ప్రారంభించారు. ఎలాంటి యంత్రాలు, సాంకేతిక పరికరాలు లేకుండా కేవలం తమ శారీరక శక్తినే నమ్ముకుని ఐదేళ్ల పాటు అవిశ్రాంతంగా శ్రమించారు.

వారి కష్టానికి ప్రతిఫలం లభించింది. బావిలో నీటి ఊట పడింది. దీంతో ఆ భూమిలో సాగు పనులు కూడా ప్రారంభించారు. అయితే, ఇటీవల కురిసిన భారీ వర్షాలకు వారి ఐదేళ్ల శ్రమ వృథా అయింది. బావికి కాంక్రీట్ పనులు పూర్తి చేయకపోవడంతో అది కూలిపోయి మట్టితో నిండిపోయింది.

అయినా ఈ దంపతులు ఏమాత్రం నిరుత్సాహపడటం లేదు. నీటి మట్టం తగ్గగానే తిరిగి పనులు మొదలుపెట్టి, బావిని పూర్తి చేస్తామని ధీమా వ్యక్తం చేస్తున్నారు. ఒకవైపు రోజుకూలీకి వెళ్తూనే ఈ పనులు చేస్తున్నామని వారు తెలిపారు. ఇంతటి పేదరికంలో ఉన్నా, ప్రభుత్వం నుంచి రేషన్ కార్డు, పెన్షన్ వంటి కనీస సహాయం కూడా అందడం లేదని వారు ఆవేదన వ్యక్తం చేస్తున్నారు.