సన్యాసినిగా మారిన నటి

వెండితెరపై గ్లామర్‌తో మెరిసిన ఒక నటి, 150కి పైగా సీరియళ్లలో నటించి ప్రేక్షకుల మన్ననలు పొందిన ఆమె, ఇప్పుడు హిమాలయాల్లో సన్యాసినిగా జీవిస్తున్నారు. 'శక్తిమాన్' వంటి ప్రముఖ సీరియల్‌తో గుర్తింపు పొందిన నుపుర్ అలంకార్ ప్రాపంచిక సుఖాలను త్యజించి ఆధ్యాత్మిక మార్గాన్ని ఎంచుకున్నారు. ఒక బ్యాంకు కుంభకోణం తన జీవితాన్ని ఎలా తలకిందులు చేసిందో, సన్యాసం వైపు ఎందుకు అడుగులు వేయాలో ఆమె ఇటీవల ఒక ఇంటర్వ్యూలో వివరించారు.

బ్యాంకు స్కామ్ మార్చేసిన జీవితం

2019లో పంజాబ్ అండ్ మహారాష్ట్ర కోఆపరేటివ్ (పీఎంసీ) బ్యాంకు కుంభకోణం తన జీవితాన్ని తీవ్రంగా ప్రభావితం చేసిందని నుపుర్ ఆవేదన వ్యక్తం చేశారు. ఆ స్కామ్ బయటపడటంతో రిజర్వ్ బ్యాంక్ ఆంక్షలు విధించింది. దీంతో బ్యాంకులో తన సొంత డబ్బు ఉన్నప్పటికీ, అనారోగ్యంతో ఉన్న తల్లికి మెరుగైన వైద్యం అందించేందుకు దాన్ని వాడుకోలేని నిస్సహాయ స్థితికి చేరుకున్నానని ఆమె వాపోయారు. ‘ఆర్థిక ఇబ్బందుల మధ్యే అమ్మ, సోదరి మరణించారు. ఆ సంఘటనల తర్వాత ఈ ప్రపంచంతో నాకు బంధం తెగిపోయిందనిపించింది. అందుకే అన్ని బంధాలను వదులుకున్నాను’ అని ఆమె తెలిపారు.

భిక్షాటనతో అహంకారం దూరం

ప్రస్తుతం పీతాంబరమాగా పేరు మార్చుకుని హిమాలయాల్లో నివసిస్తున్న ఆమె తన దినచర్య గురించి పంచుకున్నారు. ప్రతిరోజూ భిక్షాటన చేస్తానని, వచ్చిన దాంట్లో కొంత దేవుడికి, మరికొంత గురువుకు సమర్పిస్తానని చెప్పారు. భిక్షాటన చేయడం వల్ల మనిషిలోని అహంకారం నశిస్తుందని ఆమె పేర్కొన్నారు. కేవలం నాలుగైదు జతల దుస్తులతోనే జీవితం గడుపుతున్నానని, ఆశ్రమానికి వచ్చేవారు ఇచ్చే బట్టలనే వాడుకుంటానని తెలిపారు. కొన్నిసార్లు తీవ్రమైన మంచు తుఫానులు వచ్చినప్పుడు గుహల్లో తలదాచుకున్న సందర్భాలు కూడా ఉన్నాయని వివరించారు.

పీఎంసీ బ్యాంకు స్కామ్ కారణంగా వేలాది మంది డిపాజిటర్లు తీవ్ర ఇబ్బందులు పడ్డారు. ఆర్‌బీఐ మొదట కేవలం రూ.1000 మాత్రమే విత్‌డ్రా చేసుకునేందుకు అనుమతివ్వడంతో చాలామంది తమ అవసరాలకు డబ్బులు తీసుకోలేకపోయారు. ఈ సంక్షోభం వల్ల సుమారు 200 మందికి పైగా కస్టమర్లు ప్రాణాలు కోల్పోయినట్లు అప్పట్లో వార్తలు వచ్చాయి. ఒకప్పుడు కెమెరా ముందు ఎన్నో భావోద్వేగాలను పండించిన నుపుర్, ఇప్పుడు నిజ జీవితంలో అన్ని బంధాలను తెంచుకుని ప్రశాంతతను వెతుక్కుంటున్నారు.