రెండో టీ20... 32 పరుగులకే 4 వికెట్లు కోల్పోయిన భారత్

ఆస్ట్రేలియాతో జరుగుతున్న రెండో టీ20 మ్యాచ్‌లో భారత జట్టు పీకల్లోతు కష్టాల్లో పడింది. మెల్‌బోర్న్ క్రికెట్ గ్రౌండ్ వేదికగా జరుగుతున్న ఈ మ్యాచ్‌లో ఆసీస్ బౌలర్ల ధాటికి టీమిండియా టాపార్డర్ కుప్పకూలింది. పవర్ ప్లే ఇంకా ముగియకముందే, కేవలం 32 పరుగులకే 4 కీలక వికెట్లు కోల్పోయి తీవ్ర ఒత్తిడిలో పడింది.

ఈ మ్యాచ్‌లో టాస్ గెలిచిన ఆస్ట్రేలియా కెప్టెన్ ఫీల్డింగ్ ఎంచుకున్నాడు. బ్యాటింగ్‌కు దిగిన భారత్‌కు ఆరంభం నుంచే గట్టి ఎదురుదెబ్బలు తగిలాయి. ముఖ్యంగా ఆసీస్ స్టార్ పేసర్ జోష్ హాజల్‌వుడ్ తన అద్భుతమైన బౌలింగ్‌తో భారత బ్యాటర్లను ముప్పుతిప్పలు పెట్టాడు. ఓపెనర్ శుభ్‌మన్ గిల్ (5), కెప్టెన్ సూర్యకుమార్ యాదవ్ (1), తిలక్ వర్మ (0)లను స్వల్ప స్కోర్లకే పెవిలియన్‌కు పంపాడు. మరోవైపు, నాథన్ ఎల్లిస్ బౌలింగ్‌లో సంజూ శాంసన్ (2) ఎల్బీడబ్ల్యూగా వెనుదిరిగాడు.

హాజల్‌వుడ్ కేవలం 3 ఓవర్లు వేసి 6 పరుగులు మాత్రమే ఇచ్చి 3 వికెట్లు పడగొట్టి భారత బ్యాటింగ్ లైనప్‌ను దెబ్బతీశాడు. ఒకవైపు వికెట్లు వరుసగా పడుతున్నా, యువ ఓపెనర్ అభిషేక్ శర్మ మాత్రం ధాటిగా ఆడుతున్నాడు. కేవలం 9 బంతుల్లో 3 ఫోర్లు, ఒక సిక్సర్‌తో 24 పరుగులు చేసి ఒంటరి పోరాటం చేస్తున్నాడు.

ప్రస్తుతం స్కోరు 5 ఓవర్లలో 4 వికెట్లకు 33 పరుగులు. క్రీజులో అభిషేక్ శర్మకు తోడుగా అక్షర్ పటేల్ (1) ఉన్నాడు. ఆసీస్ బౌలర్ల కట్టుదిట్టమైన బౌలింగ్ ముందు భారత జట్టు ఏ మేరకు స్కోరు చేస్తుందో చూడాలి.