శారీరక సంబంధం: వైద్యుడిపై మహిళా సిబ్బంది సోదరుడి దాడి
- ముంబై కేఈఎం ఆసుపత్రి వైద్యుడిపై కత్తితో దాడి
- తీవ్ర గాయాలతో అదే ఆసుపత్రిలో చికిత్స పొందుతున్న బాధితుడు
- పరారీలో ముగ్గురు నిందితులు, పోలీసుల గాలింపు
పోలీసులు తెలిపిన వివరాల ప్రకారం, కేఈఎం ఆసుపత్రిలో పనిచేస్తున్న ఒక మహిళా సిబ్బందితో బాధితుడైన డాక్టర్కు శారీరక సంబంధం ఉంది. ఈ విషయాన్ని ఆమె సోదరుడు తీవ్రంగా వ్యతిరేకించాడు. ఈ క్రమంలోనే పగ పెంచుకుని, తన సోదరితో సంబంధం పెట్టుకున్న డాక్టర్పై దాడికి పథకం రచించాడు.
ఇందుకోసం మరో ఇద్దరు స్నేహితుల సహాయం తీసుకున్నాడు. ముగ్గురూ కలిసి డాక్టర్పై కత్తులతో దాడి చేసి తీవ్రంగా గాయపరిచారు. అనంతరం వెంటనే ఘటనా స్థలం నుంచి పరారయ్యారు. సమాచారం అందుకున్న పోలీసులు సంఘటనా స్థలానికి చేరుకుని వివరాలు సేకరించారు.
ఈ ఘటనపై పోలీసులు హత్యాయత్నం కేసు నమోదు చేశారు. దాడికి పాల్పడిన మహిళ సోదరుడు, అతని ఇద్దరు స్నేహితుల కోసం ప్రత్యేక బృందాలతో గాలింపు చర్యలు చేపట్టారు. ఈ ఘటన ఆసుపత్రి వర్గాల్లో కలకలం రేపింది.
