గుజరాత్‌లో హిట్ అండ్ రన్ కేసు: మద్యం మత్తులో టీచర్ బీభత్సం.. బైక్‌ను కిలోమీటర్ ఈడ్చుకెళ్లిన కారు!

గుజరాత్‌లో అత్యంత దారుణ రీతిలో హిట్ అండ్ రన్ ఘటన చోటుచేసుకుంది. మద్యం మత్తులో కారు నడిపిన ఓ ఉపాధ్యాయుడు, ద్విచక్రవాహనాన్ని ఢీకొట్టి కిలోమీటరుకు పైగా ఈడ్చుకెళ్లాడు. ఈ ప్రమాదంలో బైక్‌పై ప్రయాణిస్తున్న ఇద్దరు వ్యక్తులు తీవ్రంగా గాయపడ్డారు. ఈ ఘటనకు సంబంధించిన వీడియో సోషల్ మీడియాలో వైరల్ కావడంతో విషయం వెలుగులోకి వచ్చింది.

మహిసాగర్ జిల్లాలోని మోడాసా-లూనావాడ రోడ్డుపై (జాతీయ రహదారి 48) ఈ ప్రమాదం జరిగింది. మనీశ్ పటేల్ అనే ఉపాధ్యాయుడు తన సోదరుడు మెహుల్ పటేల్‌తో కలిసి మద్యం తాగి కారులో ప్రయాణిస్తున్నాడు. ఈ క్రమంలో దినేశ్‌భాయ్ (50), సునీల్ (21) అనే ఇద్దరు వ్యక్తులు వెళ్తున్న బైక్‌ను బలంగా ఢీకొట్టాడు. ప్రమాదం తర్వాత కూడా కారును ఆపకుండా, దాని ముందు భాగంలో ఇరుక్కుపోయిన బైక్‌ను అలాగే కిలోమీటరుకు పైగా లాక్కెళ్లాడు. ఈ ఘటనకు సంబంధించిన 33 సెకన్ల వీడియోలో, కారు కింద బైక్ చిక్కుకుని ఉండటం, ఓ వ్యక్తి కిందపడిపోవడం స్పష్టంగా కనిపించింది.

సమాచారం అందుకున్న పోలీసులు వెంటనే రంగంలోకి దిగారు. కారు నడిపిన టీచర్ మనీశ్ పటేల్‌ను, అతడి సోదరుడు మెహుల్ పటేల్‌ను అరెస్ట్ చేశారు. వారి కారు నుంచి మద్యం బాటిళ్లను స్వాధీనం చేసుకుని, వాహనాన్ని సీజ్ చేశారు. బాధితులను చికిత్స నిమిత్తం లూనావాడ, గోధ్రా సివిల్ ఆసుపత్రులకు తరలించారు.

ఈ ఘటనపై మహిసాగర్ డిప్యూటీ సూపరింటెండెంట్ ఆఫ్ పోలీస్ కమలేశ్ వాసవ మాట్లాడుతూ.. "ఇద్దరు నిందితులపై కేసు నమోదు చేశాం. ఫోరెన్సిక్ సైన్స్ లేబొరేటరీ బృందాన్ని కూడా పిలిపించాం. ప్రస్తుతం దర్యాప్తు కొనసాగుతోంది" అని తెలిపారు. అంతేకాకుండా, నిందితుడైన ఉపాధ్యాయుడి డ్రైవింగ్ లైసెన్స్‌ను రద్దు చేసేందుకు కూడా చర్యలు తీసుకుంటున్నామని ఆయన వివరించారు.