'జటాధర'తో రీఎంట్రీ.. ఆసక్తికర విషయాలు చెప్పిన శిల్పా శిరోద్కర్

సుధీర్ బాబు, సోనాక్షి సిన్హా ప్రధాన పాత్రలలో నటిస్తున్న పాన్-ఇండియా చిత్రం ‘జటాధర’. సూపర్ నేచురల్ మైథలాజికల్ థ్రిల్లర్‌గా తెరకెక్కిన ఈ సినిమాతో సీనియర్ నటి శిల్పా శిరోద్కర్ చాలా కాలం తర్వాత తెలుగు ప్రేక్షకుల ముందుకు వస్తున్నారు. నవంబర్ 7న ఈ చిత్రం విడుదల కానున్న సందర్భంగా ఆమె సినిమా విశేషాలను పంచుకున్నారు.

చాలా ఏళ్ల క్రితం వచ్చిన ‘బ్రహ్మ’ తర్వాత మళ్లీ తెలుగులో నటించడం ఎంతో సంతోషంగా ఉందని శిల్పా శిరోద్కర్ తెలిపారు. “ఈ చిత్రంలో నేను 'శోభ' అనే పాత్రలో కనిపిస్తాను. డబ్బుపై విపరీతమైన ఆశ, ఎలాగైనా ధనవంతురాలు కావాలనే తపన ఉన్న పాత్ర అది. ఇలాంటి పాత్ర నేను ఇంతకుముందు చేయలేదు, అందుకే చాలా సవాలుగా అనిపించింది. దర్శకుల స్పష్టమైన విజన్‌తో ఈ పాత్రను పోషించగలిగాను” అని ఆమె వివరించారు.

హీరో సుధీర్ బాబుతో పనిచేయడంపై మాట్లాడుతూ, “ఆయనతో పనిచేయడం ఒక మంచి అనుభవం. ఈ తరం నటుల నుంచి నేర్చుకోవాల్సింది చాలా ఉంది. ఆయన మాకు బంధువు అయినప్పటికీ, సెట్‌లో మేమిద్దరం చాలా ప్రొఫెషనల్‌గా నటులుగానే ఉన్నాము” అని చెప్పారు. అలాగే, ‘జటాధర’ ట్రైలర్‌ను మహేశ్ బాబు విడుదల చేసి, తనను ఇండస్ట్రీకి తిరిగి స్వాగతించడం ఎంతో ఆనందాన్నిచ్చిందని ఆమె పేర్కొన్నారు.

‘బ్రహ్మ’ సినిమా సమయానికి, ఇప్పటికీ తెలుగు పరిశ్రమలో ఎన్నో సానుకూల మార్పులు వచ్చాయని శిల్ప అభిప్రాయపడ్డారు. “టాలీవుడ్ ఇప్పుడు కంటెంట్ పరంగా, సాంకేతికంగా ఎంతో అభివృద్ధి చెందింది. ప్రస్తుతం తెలుగు సినిమా ఒక ఉత్తమ దశలో ఉంది” అని ఆమె అన్నారు.

‘జటాధర’ సినిమా గురించి చెబుతూ, “అద్భుతమైన విజువల్స్, బలమైన భావోద్వేగాలు, మంచి సంగీతంతో ఈ సినిమా ప్రేక్షకులకు గొప్ప అనుభూతిని ఇస్తుంది” అని శిల్ప ధీమా వ్యక్తం చేశారు. దర్శకులు వెంకట్ కల్యాణ్, అభిషేక్ జైస్వాల్‌ నటీనటుల నుంచి ఏం కావాలో స్పష్టంగా రాబట్టుకున్నారని, నిర్మాతలు ఉన్నతమైన విలువలతో సినిమాను నిర్మించారని ప్రశంసించారు. ట్రైలర్‌కు వస్తున్న స్పందనతో సినిమాపై అంచనాలు పెరిగాయని, నవంబర్ 7న ప్రేక్షకులు ఒక మంచి చిత్రాన్ని చూస్తారని ఆమె ముగించారు.