మహిళల వరల్డ్ కప్: బంగ్లాను కట్టడి చేసిన టీమిండియా బౌలర్లు

మహిళల వన్డే ప్రపంచకప్‌లో భారత బౌలర్లు అద్భుత ప్రదర్శన చేశారు. వర్షం కారణంగా 27 ఓవర్లకు కుదించిన చివరి గ్రూప్ మ్యాచ్‌లో బంగ్లాదేశ్‌ను 9 వికెట్ల నష్టానికి 119 పరుగులకే కట్టడి చేశారు. స్నేహ్ రాణా స్థానంలో జట్టులోకి వచ్చిన లెఫ్ట్ ఆర్మ్ స్పిన్నర్ రాధా యాదవ్ (3/30) తన స్పిన్‌తో మాయ చేయగా, మరో స్పిన్నర్ ఎన్. శ్రీ చరణి (2/23) ఆమెకు చక్కటి సహకారం అందించింది.

నవీ ముంబైలోని డీవై పాటిల్ స్టేడియంలో జరిగిన ఈ మ్యాచ్‌కు వర్షం పదేపదే అంతరాయం కలిగించింది. టాస్ ఆలస్యంగా పడగా, గెలిచిన భారత కెప్టెన్ హర్మన్‌ప్రీత్ కౌర్ బౌలింగ్ ఎంచుకుంది. ఈ మ్యాచ్ కోసం భారత్ మూడు మార్పులు చేసింది. గాయపడిన రిచా ఘోష్ స్థానంలో వికెట్ కీపర్ ఉమా ఛెత్రి అరంగేట్రం చేయగా, క్రాంతి గౌడ్, స్నేహ్ రాణా స్థానాల్లో అమన్‌జోత్ కౌర్, రాధా యాదవ్ జట్టులోకి వచ్చారు.

భారత బౌలర్లు ఆరంభం నుంచే బంగ్లాదేశ్‌పై ఒత్తిడి పెంచారు. రేణుకా సింగ్ వేసిన వైడ్ బంతిని ఆడే ప్రయత్నంలో సుమయ్యా అక్తర్ ఔటైంది. ఆ తర్వాత నెమ్మదిగా ఆడిన బంగ్లాదేశ్, దీప్తి శర్మ బౌలింగ్‌లో మరో వికెట్ కోల్పోయింది. స్కోరు 39/2 వద్ద ఉన్నప్పుడు వర్షం మళ్లీ కురవడంతో ఆటను 27 ఓవర్లకు కుదించారు.

ఆట తిరిగి ప్రారంభమయ్యాక భారత బౌలర్లు మరింత పట్టుబిగించారు. బంగ్లా కెప్టెన్ నిగర్ సుల్తానా (9)ను రాధా యాదవ్ అద్భుతమైన ఫీల్డింగ్‌తో రనౌట్ చేసింది. బంగ్లాదేశ్ తరఫున షర్మిన్ అక్తర్ (36), శోభన మోస్తరీ (26) మాత్రమే కాస్త రాణించారు. వీరిద్దరి భాగస్వామ్యాన్ని రాధా యాదవ్ విడదీయడంతో బంగ్లా ఇన్నింగ్స్ పతనమైంది. వేగంగా పరుగులు చేసే ప్రయత్నంలో బంగ్లా బ్యాటర్లు వరుసగా వికెట్లు చేజార్చుకున్నారు. షర్మిన్ అక్తర్‌ను సబ్‌స్టిట్యూట్ ఫీల్డర్ అరుంధతి రెడ్డి అద్భుతమైన డైవింగ్ క్యాచ్‌తో పెవిలియన్‌కు పంపింది.

ఈ మ్యాచ్‌లో ఫీల్డింగ్ చేస్తున్న సమయంలో భారత ఓపెనర్ ప్రతికా రావల్ జారిపడటంతో చీలమండకు గాయమైంది. ఆమె ఫిజియో సహాయంతో మైదానాన్ని వీడటం కాస్త ఆందోళన కలిగించింది. నిర్ణీత 27 ఓవర్లలో బంగ్లాదేశ్ 9 వికెట్లు కోల్పోయి 119 పరుగులు మాత్రమే చేయగలిగింది.