మహిళల ప్రపంచకప్: భారత్-బంగ్లాదేశ్ మ్యాచ్‌కు వరుణుడి ఆటంకం

ఐసీసీ మహిళల వన్డే ప్రపంచకప్‌లో భాగంగా భారత్, బంగ్లాదేశ్ జట్ల మధ్య జరగాల్సిన మ్యాచ్‌కు వర్షం అడ్డంకిగా మారింది. ఆదివారం ముంబైలోని డాక్టర్ డీవై పాటిల్ స్టేడియంలో టాస్‌కు కొద్ది నిమిషాల ముందు వర్షం ప్రారంభం కావడంతో మ్యాచ్ ఆలస్యంగా మొదలుకానుంది.

మ్యాచ్ ప్రారంభానికి ముందు నుంచే ఆకాశం మేఘావృతమై ఉంది. రెండు జట్లు వార్మప్ చేస్తున్న సమయంలో, టాస్‌కు సుమారు 15 నిమిషాల ముందు చినుకులు మొదలయ్యాయి. దీంతో గ్రౌండ్ సిబ్బంది వెంటనే స్పందించి పిచ్‌ను కవర్లతో కప్పివేశారు. కొద్దిసేపటికే వర్షం కాస్త పెరగడంతో ఆటగాళ్లు డగౌట్‌కు వెళ్లిపోయారు. దాదాపు 10 నిమిషాల పాటు వర్షం కురవడంతో టాస్‌ను వాయిదా వేస్తున్నట్లు అధికారులు ప్రకటించారు. వర్షం ఆగిపోవడంతో సిబ్బంది కవర్లను తొలగించడం ప్రారంభించినా, మళ్లీ చినుకులు మొదలవడంతో పిచ్‌ను తిరిగి కవర్లతో కప్పారు.

అరంగేట్రం చేసిన ఉమా ఛెత్రి
ఇదిలా ఉండగా, ఈ మ్యాచ్ ద్వారా భారత వికెట్ కీపర్ బ్యాటర్ ఉమా ఛెత్రి వన్డేల్లో అరంగేట్రం చేసింది. న్యూజిలాండ్‌తో జరిగిన గత మ్యాచ్‌లో గాయపడిన రిచా ఘోష్ స్థానంలో ఉమాకు తుది జట్టులో అవకాశం దక్కింది. వర్షం కారణంగా ఆటగాళ్లు మైదానం వీడటానికి ముందు జరిగిన ఒక చిన్న కార్యక్రమంలో వైస్ కెప్టెన్ స్మృతి మంధన, ఉమాకు ఇండియా క్యాప్‌ను అందజేశారు. ఉమా ఛెత్రి గతంలో టీ20ల్లో భారత్‌కు ప్రాతినిధ్యం వహించినా, వన్డేల్లో ఇదే ఆమెకు తొలి మ్యాచ్.

ఇప్పటికే సెమీఫైనల్ బెర్తులు ఖరారు కావడంతో ఈ మ్యాచ్ ఫలితం టోర్నీపై ఎలాంటి ప్రభావం చూపదు. అయినప్పటికీ, సెమీస్‌కు ముందు తమ ప్రదర్శనను మెరుగుపరుచుకోవాలని భారత్ భావిస్తోంది. అక్టోబర్ 30న ఇదే వేదికపై ఆస్ట్రేలియాతో జరిగే కీలకమైన సెమీఫైనల్ మ్యాచ్‌కు ముందు ఈ మ్యాచ్ టీమిండియాకు మంచి ప్రాక్టీస్‌గా ఉపయోగపడనుంది. అయితే, ఆ సెమీఫైనల్ రోజున కూడా వర్షం కురిసే అవకాశం ఉందని వాతావరణ శాఖ అంచనా వేస్తుండటం ఆందోళన కలిగిస్తోంది.