'శివ' రీ-రిలీజ్... రెండు లారీల పేపర్లు తీసుకెళ్లండన్న అల్లు అర్జున్!

టాలీవుడ్ ట్రెండ్ సెట్టర్, డైరెక్టర్ రామ్ గోపాల్ వర్మ, కింగ్ అక్కినేని నాగార్జున కాంబినేషన్‌లో వచ్చిన కల్ట్ క్లాసిక్ చిత్రం 'శివ'. 36 ఏళ్ల క్రితం తెలుగు సినిమా చరిత్రను మలుపుతిప్పిన ఈ చిత్రం మరోసారి థియేటర్లలో సందడి చేసేందుకు సిద్ధమైంది. నవంబర్ 14న ఈ సినిమాను గ్రాండ్‌గా రీ-రిలీజ్ చేయనున్నారు. ఈ నేపథ్యంలో చిత్ర పరిశ్రమకు చెందిన పలువురు ప్రముఖులు 'శివ'తో తమకున్న అనుబంధాన్ని గుర్తుచేసుకుంటున్నారు. ఇప్పటికే దర్శకులు శేఖర్ కమ్ముల, అశుతోష్ గోవారికర్ వీడియోలు విడుదల చేయగా, తాజాగా ఐకాన్ స్టార్ అల్లు అర్జున్ ఈ జాబితాలో చేరారు.

'శివ' రీ-రిలీజ్‌పై అల్లు అర్జున్ ఒక ప్రత్యేక వీడియోను విడుదల చేశారు. "తెలుగు సినిమా చరిత్రలో 'శివ' ఒక ఐకానిక్ చిత్రం. ఈ ఒక్క సినిమాతో భారతీయ చిత్ర పరిశ్రమలో ఎన్నో మార్పులు వచ్చాయి. అలాంటి సినిమా మళ్లీ థియేటర్లలోకి వస్తుంటే, ఆ సంబరాన్ని గ్రాండ్‌గా జరుపుకోవాలి. అక్కినేని అభిమానులకు, తెలుగు సినీ ప్రియులకు నాదొక విజ్ఞప్తి. ఈసారి థియేటర్‌కు వెళ్లేటప్పుడు రెండు లారీల పేపర్లు తీసుకెళ్లండి" అంటూ తనదైన శైలిలో పిలుపునిచ్చారు.