టాలీవుడ్‌లో ఫ్రెష్ కాంబో.. సుజీత్ దర్శకత్వంలో నాని, పూజా!

‘ఓజీ’ చిత్రంతో బ్లాక్‌బస్టర్ విజయాన్ని అందుకున్న దర్శకుడు సుజీత్, తన తదుపరి ప్రాజెక్ట్‌ను నేచురల్ స్టార్ నానితో ఖరారు చేశారు. ఈ సినిమాలో తొలిసారిగా నాని సరసన కథానాయికగా పూజా హెగ్డే నటించనుండటంతో టాలీవుడ్‌లో ఈ కొత్త జంటపై ఆసక్తికరమైన చర్చ మొదలైంది. వీరిద్దరి కాంబినేషన్‌లో వస్తున్న మొదటి సినిమా ఇదే కావడంతో అభిమానుల్లో అంచనాలు నెలకొన్నాయి.

ఈ భారీ చిత్రాన్ని ‘శ్యామ్ సింగరాయ్’, ‘సైంధవ్’ వంటి విజయవంతమైన చిత్రాల నిర్మాత వెంకట్ బోయనపల్లి నిర్మిస్తున్నారు. ఈ ప్రాజెక్ట్‌కు మరింత బలాన్ని చేకూరుస్తూ, పాన్-ఇండియా నటుడు, మలయాళ సూపర్‌స్టార్ పృథ్వీరాజ్ సుకుమారన్ ఒక కీలక పాత్రలో కనిపించనున్నారని సమాచారం. ఈ వార్తతో సినిమా స్థాయి అమాంతం పెరిగింది.

దీపావళి పండగ అనంతరం ఈ సినిమా రెగ్యులర్ చిత్రీకరణ ప్రారంభం కానుంది. ఇది ‘ఓజీ’ యూనివర్స్‌కు సంబంధం లేని పూర్తి కొత్త కథ అని, ‘రన్ రాజా రన్’ తరహాలో యూత్‌ఫుల్ యాక్షన్ ఎంటర్‌టైనర్‌గా ఉంటుందని చిత్ర వర్గాలు చెబుతున్నాయి. ప్రస్తుతానికి ఈ సినిమాకు ‘బ్లడీ రోమియో’ అనే వర్కింగ్ టైటిల్‌ను పరిశీలిస్తున్నట్లు తెలుస్తోంది.

ప్రస్తుతం నాని 'ప్యారడైజ్ సినిమా' చిత్రీకరణలో బిజీగా ఉన్నారు. ఈ కొత్త ప్రాజెక్ట్‌ను 2026 ప్రథమార్థంలో పూర్తి చేసి, అదే ఏడాది ద్వితీయార్థంలో విడుదల చేయాలని లక్ష్యంగా పెట్టుకున్నారు. ఇక కొంతకాలంగా తెలుగు తెరకు దూరంగా ఉన్న పూజా హెగ్డేకు ఇది ఒకరకంగా రీ-ఎంట్రీ అనే చెప్పాలి. ఆమె ప్రస్తుతం దుల్కర్ సల్మాన్‌తో కలిసి మరో తెలుగు సినిమాలో కూడా నటిస్తున్నారు.