AP Weather: అరేబియా సముద్రంలో అల్పపీడనం.. ఏపీలో భారీ వర్షాలకు అవకాశం

ఏపీలో వర్షాలు పుంజుకోనున్నాయని వాతావరణ శాఖ వెల్లడించింది. అరేబియా సముద్రంలో ఏర్పడనున్న అల్పపీడనం ప్రభావంతో రాష్ట్రంలో వర్షపాతం పెరిగే అవకాశం ఉందని తెలిపింది. ముఖ్యంగా ఈ నెల 19 నుంచి రాయలసీమ, దక్షిణ కోస్తాంధ్రలో, 20 నుంచి ఉత్తర కోస్తాలో వర్షాలు ఉద్ధృతమవుతాయని అంచనా వేసింది.

కేరళ, కర్ణాటక తీరాలకు సమీపంలో అరేబియా సముద్రంలో కొనసాగుతున్న ఉపరితల ఆవర్తనం శనివారం నాటికి అల్పపీడనంగా మారనుంది. రాబోయే రెండు రోజుల్లో ఇది మరింత బలపడి వాయుగుండంగా రూపాంతరం చెందుతుందని వాతావరణ శాఖ అధికారులు తెలిపారు. ఈ వాతావరణ వ్యవస్థ ప్రభావంతో బంగాళాఖాతం నుంచి తేమతో కూడిన గాలులు ఏపీ మీదుగా అరేబియా సముద్రం వైపు ప్రయాణిస్తాయని, దీని ఫలితంగా రాష్ట్రవ్యాప్తంగా విస్తారంగా వర్షాలు కురుస్తాయని వివరించారు.

ఇప్పటికే ఈశాన్య రుతుపవనాల ఆగమనంతో రాష్ట్రంలోకి తూర్పు గాలులు ప్రవేశించాయి. దీని కారణంగా శుక్రవారం రాయలసీమ, దక్షిణ కోస్తా జిల్లాల్లో పలుచోట్ల వర్షాలు నమోదయ్యాయి. రానున్న 24 గంటల్లో ఈ ప్రాంతాల్లో అక్కడక్కడా భారీ వర్షాలు, ఉత్తర కోస్తాలో తేలికపాటి నుంచి మోస్తరు వర్షాలు కురిసే అవకాశం ఉందని వాతావరణ శాఖ పేర్కొంది. రైతులు, ప్రజలు అప్రమత్తంగా ఉండాలని సూచించింది.