కర్నూలు సభలో విద్యుత్ షాక్ తో టీడీపీ అభిమాని మృతి.... మంత్రి నారా లోకేశ్ దిగ్భ్రాంతి

కర్నూలులో నిన్న నిర్వహించిన సూపర్ జీఎస్టీ-సూపర్ సేవింగ్స్ సభలో అపశ్రుతి చోటుచేసుకుంది. ఈ సభకు హాజరైన అర్జున్ అనే టీడీపీ అభిమాని విద్యుత్ షాక్‌కు గురై మరణించడం తీవ్ర విషాదాన్ని నింపింది. ఈ దురదృష్టకర ఘటనపై రాష్ట్ర ఐటీ, విద్య శాఖ మంత్రి నారా లోకేశ్ తీవ్ర దిగ్భ్రాంతి వ్యక్తం చేశారు. అర్జున్ మరణవార్త తనను తీవ్రంగా కలచివేసిందని ఆయన ఆవేదన వ్యక్తం చేశారు.

"కర్నూలు సభలో విద్యుత్ షాక్‌ తగిలి టీడీపీ అభిమాని అర్జున్ మృతి చెందడం నన్ను కలచివేసింది. అర్జున్‌కు కన్నీటి నివాళులు అర్పిస్తున్నాను. వారి కుటుంబానికి నా ప్రగాఢ సంతాపం తెలియజేస్తున్నాను" అని తెలిపారు.

అంతేకాకుండా, మృతుని కుటుంబాన్ని అన్ని విధాలుగా ఆదుకుంటామని ఆయన హామీ ఇచ్చారు. ప్రభుత్వం అండగా ఉంటుందని భరోసా కల్పించారు. పార్టీ కార్యక్రమం సందర్భంగా ఈ దుర్ఘటన జరగడం స్థానిక టీడీపీ వర్గాల్లో తీవ్ర విషాదాన్ని నింపింది.