'జటాధర' ట్రైలర్ రిలీజ్ చేసిన మహేశ్ బాబు... ఒళ్లు గగుర్పొడిచేలా విజువల్స్!

యంగ్ హీరో సుధీర్ బాబు, బాలీవుడ్ నటి సోనాక్షి సిన్హా ప్రధాన పాత్రల్లో నటిస్తున్న సూపర్ నేచురల్ ఫాంటసీ థ్రిల్లర్ 'జటాధర' ట్రైలర్ వచ్చేసింది. సూపర్ స్టార్ మహేశ్ బాబు శుక్రవారం ఈ ట్రైలర్‌ను తన ఎక్స్ ఖాతా ద్వారా విడుదల చేశారు. "ఇదే జటాధర ట్రైలర్. ఈ సినిమా గొప్ప విజయం సాధించాలని చిత్ర బృందానికి నా శుభాకాంక్షలు" అని పోస్ట్ చేశారు. విడుదలైన కాసేపటికే ఈ ట్రైలర్, ప్రేక్షకులను భయంతో వణికిస్తూ సోషల్ మీడియాలో అందరి దృష్టిని ఆకర్షిస్తోంది.

ట్రైలర్‌ను బట్టి చూస్తే, ఈ కథ ప్రాచీన కాలంలోని క్షుద్రశక్తుల చుట్టూ తిరుగుతుందని అర్థమవుతోంది. పూర్వకాలంలో టన్నుల కొద్దీ సంపదను భూమిలో పాతిపెట్టి, దానిని కాపాడేందుకు 'పిశాచ బంధనం' వంటి భయంకరమైన మంత్రాలతో బంధించేవారని ట్రైలర్‌లో చూపించారు. దెయ్యాలు లేవని నిరూపించాలనుకునే ఒక పరిశోధకుడు, అనుకోకుండా ఆ బంధనాన్ని విచ్ఛిన్నం చేసి 'ధన పిశాచి'ని బయటకు రప్పిస్తాడు. ఆ తర్వాత జరిగే పరిణామాలు ఉత్కంఠ రేపుతున్నాయి.

ఈ సినిమా కోసం సుధీర్ బాబు తనను తాను పూర్తిగా మార్చుకున్నట్లు తెలుస్తోంది. మునుపెన్నడూ చూడని భయంకరమైన గెటప్‌లో ఆయన కనిపించారు. ముఖ్యంగా, మట్టిలో నుంచి రక్తాన్ని తాగే ఒక సన్నివేశం ఒళ్లు గగుర్పొడిచేలా ఉంది. మరోవైపు, సోనాక్షి సిన్హా ప్రతీకారంతో రగిలిపోయే 'ధన పిశాచి' పాత్రలో అత్యంత క్రూరంగా, భయానకంగా కనిపించి ఆశ్చర్యపరిచారు. అవసరాల శ్రీనివాస్, శిల్పా శిరోద్కర్ కీలక పాత్రల్లో నటిస్తున్నారు.

వెంకట్ కల్యాణ్, అభిషేక్ జైస్వాల్ దర్శకత్వం వహించిన ఈ సినిమాలో విజువల్స్, నేపథ్య సంగీతం ప్రధాన ఆకర్షణగా నిలవనున్నాయి. సమీర్ కల్యాణి సినిమాటోగ్రఫీ, రాజీవ్ రాజ్ సంగీతం ట్రైలర్‌కు ప్రాణం పోశాయి. జీ స్టూడియోస్, ప్రేరణ అరోరా నిర్మిస్తున్న ఈ చిత్రాన్ని తెలుగు, హిందీ భాషల్లో ఏకకాలంలో నవంబర్ 7న విడుదల చేసేందుకు సన్నాహాలు చేస్తున్నారు.