BR Naidu: శ్రీవారి లడ్డూ ధరలు పెంచుతున్నారా?... క్లారిటీ ఇచ్చిన బీఆర్ నాయుడు

శ్రీవారి లడ్డూ ప్రసాదం ధరను తిరుమల తిరుపతి దేవస్థానం (టీటీడీ) పెంచనుందంటూ కొన్ని రోజులుగా ప్రచారంలో ఉన్న వార్తలపై టీటీడీ ఛైర్మన్ బీఆర్ నాయుడు స్పష్టత ఇచ్చారు. లడ్డూ ధరను పెంచే ఆలోచన తమకు ఏమాత్రం లేదని ఆయన తేల్చిచెప్పారు. ఈ మేరకు వస్తున్న వార్తలు పూర్తిగా నిరాధారమైనవని, అవాస్తవమని కొట్టిపారేశారు.

కొన్ని బాధ్యతారహిత మీడియా సంస్థలు ఉద్దేశపూర్వకంగానే ఇలాంటి తప్పుడు వార్తలను ప్రసారం చేస్తున్నాయని బీఆర్ నాయుడు ఆరోపించారు. టీటీడీ ప్రతిష్ఠకు, ఆంధ్రప్రదేశ్ ప్రభుత్వానికి చెడ్డపేరు తీసుకురావాలనే దురుద్దేశంతోనే ఈ దుష్ప్రచారం చేస్తున్నారని ఆయన మండిపడ్డారు. ఇలాంటి నిరాధారమైన కథనాలను తాను తీవ్రంగా ఖండిస్తున్నట్లు తెలిపారు.

భక్తులు ఎవరూ ఈ వదంతులను నమ్మవద్దని ఆయన విజ్ఞప్తి చేశారు. పవిత్రమైన తిరుపతి లడ్డూ ప్రసాదం ధరను పెంచే ప్రతిపాదన టీటీడీ వద్ద ఎప్పుడూ లేదని, భవిష్యత్తులో కూడా అలాంటి ఆలోచన చేయబోమని బీఆర్ నాయుడు పునరుద్ఘాటించారు. టీటీడీపై బురద చల్లే ప్రయత్నంలో భాగంగానే కొందరు ఇలాంటి అసత్య ప్రచారాలకు పాల్పడుతున్నారని ఆయన వ్యాఖ్యానించారు.