Nestle: నెస్లేలో భారీగా ఉద్యోగాల కోత... 16,000 మంది ఇంటికి!

ప్రముఖ అంతర్జాతీయ ఆహార ఉత్పత్తుల దిగ్గజం నెస్లే సంచలన నిర్ణయం తీసుకుంది. ప్రపంచవ్యాప్తంగా తమ సంస్థలో పనిచేస్తున్న 16,000 మంది ఉద్యోగులను తొలగించనున్నట్లు గురువారం ప్రకటించింది. ఈ వార్త ఉద్యోగులను ఆందోళనకు గురిచేసినప్పటికీ, స్టాక్ మార్కెట్లో మాత్రం కంపెనీ షేర్ల ధర 8 శాతానికి పైగా పెరగడం గమనార్హం.

ఈ ఏడాది సెప్టెంబర్‌లో నెస్లే చీఫ్ ఎగ్జిక్యూటివ్‌గా బాధ్యతలు చేపట్టిన ఫిలిప్ నవ్రతిల్ ఈ మేరకు ఒక ప్రకటన విడుదల చేశారు. "ప్రపంచం వేగంగా మారుతోంది. దానికి అనుగుణంగా నెస్లే కూడా వేగంగా మారాల్సిన అవసరం ఉంది. సిబ్బందిని తగ్గించడం కఠినమైన నిర్ణయమే అయినా, ప్రస్తుత పరిస్థితుల్లో ఇది తప్పనిసరి" అని ఆయన పేర్కొన్నారు. రాబోయే రెండేళ్లలో ఈ తొలగింపుల ప్రక్రియను పూర్తి చేయనున్నట్లు కంపెనీ తెలిపింది.

ఉద్యోగాల కోతలో భాగంగా 12,000 వైట్ కాలర్ ఉద్యోగాలను, మరో 4,000 ప్రొడక్షన్, సప్లై చైన్ విభాగాల్లోని ఉద్యోగాలను తగ్గించనున్నారు. ఈ నిర్ణయం ద్వారా కంపెనీకి ఒక బిలియన్ స్విస్ ఫ్రాంకుల వరకు ఆదా అవుతుందని అంచనా వేస్తున్నారు. అంతేగాక‌ 2027 చివరి నాటికి తమ పొదుపు లక్ష్యాన్ని 2.5 బిలియన్ల నుంచి 3 బిలియన్ స్విస్ ఫ్రాంకులకు పెంచుకుంటున్నట్లు నెస్లే వెల్లడించింది.

గత తొమ్మిది నెలల ఆర్థిక ఫలితాలను పరిశీలిస్తే, నెస్లే అమ్మకాలు 1.9 శాతం తగ్గి 65.9 బిలియన్ స్విస్ ఫ్రాంకులకు చేరాయి. ఇటీవలి కాలంలో కంపెనీలో అంతర్గత సమస్యలు, ఫ్రాన్స్‌లో బాటిల్ వాటర్ వివాదం వంటివి నెస్లే ప్రతిష్ఠను దెబ్బతీశాయి. ఈ నేపథ్యంలో, కొత్త సీఈఓ తీసుకుంటున్న దూకుడు నిర్ణయాలు కంపెనీ వృద్ధిని తిరిగి గాడిన పెడతాయని మార్కెట్ వర్గాలు భావిస్తున్నాయి. అందుకే ఉద్యోగాల కోత ప్రకటనను పెట్టుబడిదారులు సానుకూలంగా స్వాగతించారు.