బెంగాల్ అత్యాచార ఘటన... ప్రధాన నిందితుడ్ని పోలీసులకు పట్టించిన సోదరి

పశ్చిమ బెంగాల్‌లోని దుర్గాపూర్‌లో వైద్య విద్యార్థినిపై జరిగిన సామూహిక అత్యాచారం కేసులో సంచలన పరిణామం చోటుచేసుకుంది. ఈ దారుణానికి పాల్పడిన ప్రధాన నిందితుడిని అతడి సొంత సోదరే పోలీసులకు పట్టించింది. "నా సోదరుడు తప్పు చేశాడు, అతనికి కచ్చితంగా శిక్ష పడాలి" అనే ఆలోచనతో ఆమె ఈ నిర్ణయం తీసుకోవడం గమనార్హం.

వివరాల్లోకి వెళితే, ఒడిశాకు చెందిన ఓ వైద్య విద్యార్థిని గత గురువారం రాత్రి తన స్నేహితుడితో కలిసి బయటకు వెళ్లింది. ఈ క్రమంలో వారిని వెంబడించిన కొందరు యువకులు వారిపై దాడి చేశారు. భయంతో వారు చెరో దిక్కుకు పారిపోగా, నిందితులు విద్యార్థినిని పట్టుకుని సమీపంలోని అటవీ ప్రాంతంలోకి బలవంతంగా లాక్కెళ్లారు. ఆమె ఫోన్ లాక్కుని, స్నేహితుడిని రమ్మని బెదిరించారు. అతను రాకపోవడంతో ఆమెపై సామూహిక అత్యాచారానికి ఒడిగట్టారు. బాధితురాలు ప్రతిఘటించడంతో, మరికొందరిని పిలుస్తామని బెదిరించి ఆమెను నిశ్శబ్దంగా ఉంచారు.

ఈ దారుణ ఘటనపై బాధితురాలి ఫిర్యాదు మేరకు కేసు నమోదు చేసుకున్న పోలీసులు దర్యాప్తు ముమ్మరం చేశారు. ఈ కేసులో నలుగురు నిందితులతో పాటు వారికి సహకరించిన మరో వ్యక్తిని ఆదివారం అరెస్టు చేశారు. అయితే, పరారీలో ఉన్న ప్రధాన నిందితుడు సఫీక్ కోసం గాలింపు చేపట్టారు.

ఈ నేపథ్యంలో సఫీక్ సోదరి రోజీనా, తన సోదరుడు దుర్గాపూర్‌లోని అంధాల్ వంటెన్ ప్రాంతంలో దాక్కున్నట్లు పోలీసులకు సమాచారం అందించింది. ఆమె ఇచ్చిన సమాచారంతో పోలీసులు మంగళవారం సఫీక్‌ను అదుపులోకి తీసుకున్నారు. ఈ సందర్భంగా రోజీనా మీడియాతో మాట్లాడుతూ, "నా సోదరుడు ఘోరమైన తప్పు చేశాడు. అందుకే అతనికి కఠిన శిక్ష పడాలనే ఉద్దేశంతో పోలీసులకు సమాచారం ఇచ్చాను" అని స్పష్టం చేశారు. పోలీసులు అరెస్టు చేసిన ఐదుగురు నిందితులను ఘటనా స్థలానికి తీసుకెళ్లి విచారణ జరుపుతున్నారు. ఈ ఘటన రాష్ట్రవ్యాప్తంగా తీవ్ర ఆగ్రహావేశాలకు కారణమైంది.