ఆ వీడియో నేను కూడా చూశా... కోట వినుతపై బొజ్జల సుధీర్ విమర్శలు

జనసేన మాజీ నాయకురాలు కోట వినుత దంపతుల హత్యకు కుట్ర పన్నారంటూ తనపై వచ్చిన తీవ్ర ఆరోపణలపై శ్రీకాళహస్తి ఎమ్మెల్యే బొజ్జల వెంకట సుధీర్‌రెడ్డి తొలిసారిగా స్పందించారు. ఈ వివాదంపై ఆయన ఘాటుగా బదులిస్తూ, ఇదంతా చిల్లర రాజకీయమని కొట్టిపారేశారు. ఈ ఆరోపణల వెనుక రాజకీయ కుట్ర ఉందని, దీనిపై లోతైన దర్యాప్తు జరపాలని ఆయన డిమాండ్ చేశారు.

మరణించిన డ్రైవర్ రాయుడి సెల్ఫీ వీడియోను తాను కూడా చూశానని, అయితే దాని విశ్వసనీయతపై తనకు సందేహాలున్నాయని సుధీర్‌రెడ్డి పేర్కొన్నారు. "ఆ వీడియోను బెదిరించి రికార్డు చేయించారా? లేక అది ఫేక్ వీడియోనా? అనే కోణంలో పోలీసులు విచారణ జరపాలి. ఒకవేళ అది నిజమే అయితే, అతడిని ఎంతలా చిత్రహింసలు పెట్టి ఆ వీడియో తీయించారో తేల్చాలి" అని ఆయన అన్నారు. అందరిలాగే మీడియా ద్వారానే ఈ హత్య విషయం తనకు తెలిసిందని స్పష్టం చేశారు.

కోట వినుతపై ఆయన తీవ్రస్థాయిలో విరుచుకుపడ్డారు. ఆమె మొదటి నుంచి తమకు ఏనాడూ సహకరించలేదని, ఇప్పుడు దిగజారుడు రాజకీయాలకు పాల్పడుతున్నారని మండిపడ్డారు. "బెయిల్ లభించినంత మాత్రాన ఎవరూ నిర్దోషులు కారు. ఇలాంటి చెత్త రాజకీయాలు చేసేవారిని వదిలిపెట్టే ప్రసక్తే లేదు" అని ఆయన హెచ్చరించారు.

కాగా, జనసేన నుంచి సస్పెండైన కోట వినుత, ఆమె భర్తను హత్య చేసేందుకు ఎమ్మెల్యే సుధీర్‌రెడ్డి తనకు రూ.30 లక్షల సుపారీ ఇచ్చారని డ్రైవర్ రాయుడు మరణానికి ముందు తీసిన ఓ సెల్ఫీ వీడియోలో ఆరోపించడం రాష్ట్రవ్యాప్తంగా సంచలనం సృష్టించిన విషయం తెలిసిందే. ఈ కుట్రలో భాగంగా రూ.20 లక్షలు అడ్వాన్స్‌గా కూడా ఇచ్చారని ఆ వీడియోలో పేర్కొన్నారు. ఈ ఆరోపణల నేపథ్యంలో ఎమ్మెల్యే సుధీర్‌రెడ్డి తొలిసారి మీడియా ముందుకు వచ్చి తన వాదన వినిపించారు.