హీరో రామ్ పై హీరోయిన్ భాగ్యశ్రీ ప్రశంసల వర్షం

యువ కథానాయకుడు రామ్ పోతినేని నటిస్తున్న తాజా చిత్రం 'ఆంధ్రా కింగ్ తాలూకా'. వరుస పరాజయాల తర్వాత రామ్ ఈ సినిమాపైనే పూర్తి ఆశలు పెట్టుకున్నాడు. విడుదల తేదీ దగ్గర పడుతుండటంతో చిత్ర బృందం ప్రచార కార్యక్రమాలను వేగవంతం చేసింది. ఈ క్రమంలో, చిత్ర కథానాయిక భాగ్యశ్రీ బోర్సే.. హీరో రామ్ పై ప్రశంసలు కురిపిస్తూ సోషల్ మీడియాలో పెట్టిన ఓ పోస్ట్ ఇప్పుడు ఆసక్తికరంగా మారింది.

ఈ సినిమా కోసం రామ్ పడిన కష్టం చూసి తాను ఆశ్చర్యపోయినట్లు భాగ్యశ్రీ తన పోస్టులో పేర్కొంది. "ప్రియమైన రామ్, 'సాగర్' పాత్రలో మీ మ్యాజిక్ అనుభూతి చెందడానికి ప్రేక్షకులు ఎంతో ఆసక్తిగా ఎదురుచూస్తున్నారు. ఈ సినిమా కోసం మీరు చేసిన కృషి, పడిన కష్టం నన్ను ఆశ్చర్యపరిచింది. 'ఆంధ్రా కింగ్ తాలూకా' మీ అభిమానులకు ఓ పెద్ద విజయాన్ని అందిస్తుంది" అంటూ ఆమె రాసుకొచ్చింది. ఈ ఒక్క పోస్టుతో సినిమా కోసం రామ్ ఎంతలా శ్రమించాడో ఆమె స్పష్టం చేసింది.

అయితే, భాగ్యశ్రీ పోస్టుపై నెటిజన్ల నుంచి భిన్నమైన స్పందన వస్తోంది. సినిమా విడుదలకు ముందు హీరోయిన్ ఇలా హీరోను పొగడటం ప్రచారంలో ఓ కొత్త తరహా వ్యూహం అంటూ కొందరు కామెంట్లు పెడుతున్నారు. 'స్కంద', 'ది వారియర్' వంటి చిత్రాలు నిరాశపరచడంతో 'ఆంధ్రా కింగ్ తాలూకా'తో రామ్ ఎలాగైనా విజయం సాధించాలని పట్టుదలగా ఉన్నాడు. మహేశ్ బాబు. పి దర్శకత్వం వహిస్తున్న ఈ చిత్రాన్ని మైత్రి మూవీ మేకర్స్ నిర్మిస్తోంది. అన్ని కార్యక్రమాలు పూర్తి చేసుకుని ఈ సినిమా నవంబర్ 28న ప్రేక్షకుల ముందుకు రానుంది.