పాఠశాల విద్యలో కీలక మార్పు.. 3వ తరగతి నుంచే ఏఐ పాఠాలు

దేశంలో పాఠశాల విద్యారంగంలో కేంద్ర ప్రభుత్వం ఒక విప్లవాత్మక మార్పునకు సిద్ధమైంది. వేగంగా అభివృద్ధి చెందుతున్న టెక్నాలజీకి అనుగుణంగా విద్యార్థులను తీర్చిదిద్దే లక్ష్యంతో, సెంట్రల్ బోర్డ్ ఆఫ్ సెకండరీ ఎడ్యుకేషన్ (సీబీఎస్ఈ) పరిధిలోని పాఠశాలల్లో 3వ తరగతి నుంచే ఆర్టిఫిషియల్ ఇంటెలిజెన్స్ (ఏఐ) పాఠాలను ప్రవేశపెట్టాలని నిర్ణయించింది. ఈ నూతన విధానం 2026-2027 విద్యా సంవత్సరం నుంచి దేశవ్యాప్తంగా ఉన్న సుమారు 31 వేల పాఠశాలల్లో అమల్లోకి రానుంది.

ఈ కార్యక్రమం ద్వారా విద్యార్థులకు చిన్న వయసులోనే ఏఐ ప్రాథమిక అంశాలపై అవగాహన కల్పించనున్నారు. ఏఐ సహాయంతో భాషా నైపుణ్యాలను మెరుగుపరచుకోవడం, గణిత సమస్యలను పరిష్కరించడం వంటి వాటితో పాటు, చాట్‌బోట్‌ ప్రాంప్ట్‌లు, లాంగ్వేజ్‌ మోడల్స్‌, జనరేటివ్‌ ఏఐ వంటి ఆధునిక టెక్నాలజీల గురించి బోధించనున్నారు. 3వ తరగతి నుంచి ప్రాథమిక అంశాలను పరిచయం చేసి, 6వ తరగతి నుంచి ఏఐని ఒక నైపుణ్య సబ్జెక్టుగా (స్కిల్ సబ్జెక్ట్) కొనసాగించనున్నట్లు అధికారులు తెలిపారు.

ఈ విషయంపై కేంద్ర విద్యాశాఖ కార్యదర్శి సంజయ్‌కుమార్‌ మాట్లాడుతూ, "చిన్న వయసులోనే విద్యార్థులలో టెక్నాలజీ పట్ల అవగాహన పెంచాలన్నదే ప్రభుత్వ ముఖ్య ఉద్దేశం" అని స్పష్టం చేశారు. ఈ విధానాన్ని సమర్థవంతంగా అమలు చేసేందుకు ఇప్పటికే ఒక పైలట్ ప్రాజెక్టును నడుపుతున్నామని, ఇందులో భాగంగా ఉపాధ్యాయులు ఏఐ టూల్స్‌ను వినియోగిస్తున్నారని ఆయన వివరించారు.

దేశంలో ఉన్న దాదాపు కోటి మంది ఉపాధ్యాయులకు ఏఐ టెక్నాలజీపై అవగాహన కల్పించేందుకు ప్రత్యేక శిక్షణా కార్యక్రమాలను కూడా చేపట్టనున్నట్లు సంజయ్‌కుమార్‌ తెలిపారు. దీనివల్ల ఉపాధ్యాయులు నూతన సాంకేతికతను అందిపుచ్చుకుని, విద్యార్థులకు మరింత నాణ్యమైన విద్యను అందించేందుకు వీలు కలుగుతుందని ప్రభుత్వం భావిస్తోంది.