జూబ్లీహిల్స్ ఉపఎన్నిక: టీ 5 రూపాయలు, చికెన్ బిర్యానీ 170.. ప్రతీ పైసా లెక్క చెప్పాల్సిందే!

జూబ్లీహిల్స్ నియోజకవర్గ ఉప ఎన్నిక ప్రచారంలో అభ్యర్థులు చేసే ఖర్చుపై ఎన్నికల సంఘం పూర్తిస్థాయిలో దృష్టి సారించింది. అభ్యర్థుల వ్యయాలకు కళ్లెం వేసేందుకు, పారదర్శకతను పెంచేందుకు అధికారులు కీలక చర్యలు చేపట్టారు. ప్రచారంలో భాగంగా పెట్టే ప్రతి ఖర్చుకూ అధికారికంగా ధరలను నిర్ణయిస్తూ శుక్రవారం ఒక జాబితాను విడుదల చేశారు. ఇకపై అభ్యర్థులు తాము అందించే ఒక కప్పు టీ నుంచి నిర్వహించే పెద్ద సభల వరకు ప్రతీ పైసాకు లెక్క చెప్పాల్సిందే.

ఎన్నికల ప్రవర్తనా నియమావళి ప్రకారం అభ్యర్థులు తమ రోజువారీ ఖర్చుల వివరాలను తప్పనిసరిగా సమర్పించాలని అధికారులు స్పష్టం చేశారు. ఈ నిబంధనలను ఉల్లంఘిస్తే కఠిన చర్యలు తప్పవని హెచ్చరించారు. అభ్యర్థులు తమ ఖర్చులను తక్కువ చేసి చూపకుండా నిరోధించేందుకే ఈ ధరల పట్టికను రూపొందించినట్లు తెలిపారు.

ఆహారం నుంచి ఫంక్షన్ హాళ్ల వరకు
అధికారులు ప్రకటించిన ధరల జాబితా ప్రకారం.. ఒక సింగిల్ టీ ధర రూ.5, పెద్ద కప్పు టీ రూ.10గా నిర్ణయించారు. అదేవిధంగా, ప్లేట్ ఇడ్లీ (నాలుగు) రూ.20, ఒక ఆలూ సమోసా రూ.10గా ఖరారు చేశారు. ఇక భోజనాల విషయానికొస్తే, వెజ్ బిర్యానీ (750 గ్రాములు) ధర రూ.115, చికెన్ బిర్యానీ రూ.170, మటన్ బిర్యానీ రూ.180గా పేర్కొన్నారు. కార్యకర్తలకు అందించే నీటి ప్యాకెట్‌కు రూ.2, లీటర్ వాటర్ బాటిల్‌కు రూ.20 చొప్పున లెక్క చూపాల్సి ఉంటుంది.

ప్రచార సామగ్రి, సభా వేదికలకూ ధరలు
సభలు, సమావేశాల కోసం వినియోగించే వేదికలకు కూడా ధరలను నిర్ణయించారు. ఒక మినీ ఫంక్షన్ హాల్‌కు రోజుకు రూ.6,200, పెద్ద ఏసీ ఫంక్షన్ హాల్‌కు రూ.1,25,000గా ధరను నిర్ధారించారు. ప్రచారంలో ఎక్కువగా వినియోగించే డ్రోన్ కెమెరాకు 12 గంటల వినియోగానికి రూ.5,000గా లెక్క కట్టారు. వీటితో పాటు కుర్చీలు, బ్యానర్లు, వాల్ పోస్టర్లు, టీ షర్టులు, సౌండ్ బాక్సుల వంటి అన్ని ప్రచార సామగ్రికి నిర్దిష్ట ధరలను అధికారులు ఈ జాబితాలో చేర్చారు.