చంద్రబాబు విజన్ వల్లే ఆంధ్రప్రదేశ్ కు వెల్లువలా పెట్టుబడులు!: మంత్రి నారా లోకేశ్

ఆంధ్రప్రదేశ్‌ రాష్ట్రం పెట్టుబడులకు స్వర్గధామంగా మారుతోందని, ప్రపంచ ప్రసిద్ధ సంస్థలు ఇక్కడ తమ కార్యకలాపాలు ప్రారంభించేందుకు ఆసక్తి చూపుతున్నాయని రాష్ట్ర ఐటీ, ఎలక్ట్రానిక్స్, విద్యాశాఖ మంత్రి నారా లోకేశ్ తెలిపారు. ముఖ్యమంత్రి చంద్రబాబు విజన్, ఆయన నాయకత్వంపై ఉన్న నమ్మకమే దీనికి కారణమని ఆయన స్పష్టం చేశారు. విశాఖపట్నంలో నవంబర్ 14, 15 తేదీల్లో జరగనున్న ప్రతిష్ఠాత్మక 'సీఐఐ పార్టనర్‌షిప్ సమ్మిట్' నేపథ్యంలో, సోమవారం ముంబైలోని తాజ్ ప్యాలెస్ హోటల్‌లో పారిశ్రామికవేత్తలతో నిర్వహించిన రోడ్ షోలో లోకేశ్ పాల్గొన్నారు.

ఈ సందర్భంగా ఆయన మాట్లాడుతూ, రాష్ట్రంలో పెట్టుబడుల వాతావరణం అత్యంత సానుకూలంగా ఉందని, ప్రపంచ దిగ్గజ సంస్థలు ఏపీ వైపు చూస్తున్నాయని అన్నారు. టెక్నాలజీ రంగంలో మరో పెద్ద ముందడుగు వేస్తూ, ఈ నెల 14న ఒక గిగావాట్ సామర్థ్యమున్న గూగుల్ డేటా సెంటర్ ఏర్పాటు కోసం అవగాహన ఒప్పందం (ఎంఓయూ) కుదుర్చుకోనున్నట్లు ఆయన ప్రకటించారు. ఇందుకోసం కేంద్ర ప్రభుత్వంతో చర్చించి ప్రత్యేకంగా డేటా సెంటర్ పాలసీలో మార్పులు తీసుకువచ్చినట్లు తెలిపారు. 

అదేవిధంగా, ఉక్కు రంగంలో ప్రపంచ ప్రఖ్యాత సంస్థ ఆర్సెల్లార్ మిట్టల్ తమ స్టీల్ ప్లాంట్ పనులను వచ్చే నెలలోనే ప్రారంభించనుందని వెల్లడించారు. కేవలం ఒక జూమ్ కాల్ సమావేశం ద్వారా ఈ ప్రాజెక్టుకు అవసరమైన అన్ని అనుమతులు ఇచ్చామని, ఎలాంటి అధికారిక ఒప్పందం లేకుండానే 15 నెలల్లో ప్రాజెక్టును పట్టాలెక్కించగలిగామని, ఇదే తమ 'స్పీడ్ ఆఫ్ డూయింగ్ బిజినెస్'కు నిదర్శనమని లోకేశ్ వివరించారు.

చంద్రబాబు ట్రాక్ రికార్డే మా బలం

ఆంధ్రప్రదేశ్‌కు పెట్టుబడులు వెల్లువెత్తడానికి ముఖ్యమంత్రి చంద్రబాబు ట్రాక్ రికార్డే ప్రధాన కారణమని లోకేశ్ అన్నారు. "గతంలో ఉమ్మడి రాష్ట్రంలో చంద్రబాబు సైబరాబాద్‌ను నిర్మిస్తే, అది ఇప్పుడు తెలంగాణకు పవర్ హౌస్‌గా మారింది. అదేవిధంగా, విభజిత ఏపీలో వెనుకబడిన అనంతపురం జిల్లాకు కియా మోటార్స్ ఫ్యాక్టరీని తీసుకురావడంతో, ఆ జిల్లా తలసరి ఆదాయం మూడు రెట్లు పెరిగింది. ఈ నమ్మకంతోనే ఫార్చ్యూన్ 500 కంపెనీలు సైతం మా రాష్ట్రంలో పెట్టుబడులు పెట్టడానికి ముందుకు వస్తున్నాయి" అని ఆయన పేర్కొన్నారు. 

యువతకు ఉద్యోగాలు కల్పించే లక్ష్యంతో టీసీఎస్, కాగ్నిజెంట్ వంటి సంస్థలకు కేవలం 99 పైసలకే ఎకరా చొప్పున భూములు కేటాయించామని తెలిపారు. తమ ప్రభుత్వ సమర్థ పాలన వల్ల గత 17 నెలల్లోనే విద్యుత్ ఛార్జీలను యూనిట్‌కు 13 పైసలు తగ్గించగలిగామని గుర్తుచేశారు.

క్లస్టర్ విధానంతో సమగ్ర అభివృద్ధి

రాష్ట్రంలో కేవలం పెట్టుబడులు ఆకర్షించడమే కాకుండా, క్లస్టర్ల వారీగా అభివృద్ధిపై దృష్టి సారించామని లోకేశ్ తెలిపారు. ప్రధాన పరిశ్రమలకు అవసరమైన అనుబంధ యూనిట్లన్నీ 100 కిలోమీటర్ల పరిధిలోనే ఉండేలా ప్రోత్సహిస్తున్నామన్నారు. కియా మోటార్స్‌కు ఇచ్చిన ప్రోత్సాహకాలను దాని అనుబంధ పరిశ్రమలకు కూడా అందించి ఆ ప్రాంతాన్ని ఆటోమొబైల్ హబ్‌గా తీర్చిదిద్దామని ఉదహరించారు. 

భవిష్యత్ అవసరాలను దృష్టిలో ఉంచుకుని 3,500 ఎకరాల్లో ఏరోస్పేస్ సిటీని అభివృద్ధి చేయనున్నట్లు తెలిపారు. విశాఖపట్నం నగరం బెంగళూరు, గోవా నగరాల కలయికగా ఉంటుందని, అరకు వంటి పర్యాటక ప్రాంతాలతో పాటు, వ్యాపారానికి అనువైన వాతావరణం ఇక్కడ ఉందని చెప్పారు. ముంబై కంటే రెట్టింపు సామర్థ్యమున్న శక్తివంతమైన సముద్రగర్భ కేబుల్స్ విశాఖకు రానున్నాయని, ఇది డేటా ఆధారిత పరిశ్రమలకు ఎంతో కీలకమని అన్నారు.

రాబోయే రోజుల్లో విశాఖ 3 ట్రిలియన్ డాలర్ల ఆర్థిక వ్యవస్థగా మారనుందని, దేశంలోనే తొలిసారిగా అమరావతిలో జనవరి నాటికి 158 క్యూబిట్ క్వాంటమ్ కంప్యూటర్ అందుబాటులోకి రానుందని తెలిపారు. అన్ని రకాలుగా అనుకూలతలున్న ఆంధ్రప్రదేశ్‌లో పెట్టుబడులు పెట్టడానికి ముందుకు రావాలని, ప్రభుత్వం అన్ని విధాలా సహాయ సహకారాలు అందిస్తుందని పెట్టుబడిదారులకు భరోసా ఇచ్చారు. 

ఈ కార్యక్రమంలో టాటా గ్రూప్ ఛైర్మన్ ఎన్. చంద్రశేఖరన్, ట్రాఫిగురా సీఈవో సచిన్ గుప్తా, సీఐఐ ప్రతినిధులు, పలువురు పారిశ్రామికవేత్తలు పాల్గొన్నారు.