సోనమ్ వాంగ్‌చుక్ నిర్బంధం.. సుప్రీంకోర్టును ఆశ్రయించిన భార్య

లడఖ్‌కు చెందిన ప్రముఖ పర్యావరణవేత్త, ఉద్యమకారుడు సోనమ్ వాంగ్‌చుక్ నిర్బంధం కేసు సుప్రీంకోర్టుకు చేరింది. తన భర్తను అక్రమంగా నిర్బంధించారని ఆరోపిస్తూ ఆయన భార్య గీతాంజలి జె. ఆంగ్మో సర్వోన్నత న్యాయస్థానంలో హెబియస్ కార్పస్ పిటిషన్ దాఖలు చేశారు. తన భర్తను అరెస్ట్ చేసి వారం రోజులు గడిచినా, ఆయన ఆరోగ్యం, పరిస్థితి, నిర్బంధానికి గల కారణాలపై ఇప్పటికీ తనకు ఎలాంటి సమాచారం ఇవ్వలేదని ఆమె సోషల్ మీడియా వేదికగా ఆవేదన వ్యక్తం చేశారు.

లేహ్‌లో హింసను ప్రేరేపించారనే ఆరోపణలతో కేంద్ర హోం మంత్రిత్వ శాఖ వాంగ్‌చుక్‌పై జాతీయ భద్రతా చట్టం (ఎన్ఎస్ఏ) కింద కేసు నమోదు చేసి, అదుపులోకి తీసుకుంది. అనంతరం ఆయన్ను రాజస్థాన్‌లోని జోధ్‌పూర్ జైలుకు తరలించారు. సెప్టెంబర్ 10 నుంచి నిరాహార దీక్ష చేస్తున్న వాంగ్‌చుక్, పట్టణంలో హింస చెలరేగడంతో తన దీక్షను విరమించి అంబులెన్స్‌లో అక్కడి నుంచి వెళ్ళిపోయారు. ఆ తర్వాత అధికారులు ఆయన్ను నిర్బంధంలోకి తీసుకున్నారు.

సెప్టెంబర్ 24న లేహ్‌లో జరిగిన ఆందోళనల సందర్భంగా జరిగిన కాల్పుల్లో నలుగురు పౌరులు మరణించారు. ఆత్మరక్షణ కోసమే భద్రతా బలగాలు కాల్పులు జరపాల్సి వచ్చిందని కేంద్ర పాలిత ప్రాంత యంత్రాంగం చెబుతోంది. నిరసనకారులు రాళ్లు రువ్వుతూ, సీఆర్పీఎఫ్ వాహనానికి నిప్పుపెట్టి జవాన్లను సజీవదహనం చేసేందుకు ప్రయత్నించారని అధికారులు తెలిపారు. ఈ ఘర్షణల్లో ఆందోళనకారులు స్థానిక బీజేపీ, లేహ్ అపెక్స్ బాడీ (ఎల్ఏబీ) కార్యాలయాలను కూడా దగ్ధం చేశారు.