కెనడాలో భారతీయ చిత్రాలు ప్రదర్శిస్తున్న థియేటర్ పై దాడులు.. ప్రదర్శనల నిలిపివేత

కెనడాలో భారతీయ చిత్రాలకు వ్యతిరేకంగా దాడులు జరగడం తీవ్ర కలకలం రేపుతోంది. దక్షిణాసియాకు చెందిన సినిమాలను ప్రదర్శిస్తున్న కారణంగా ఓ సినిమా థియేటర్‌పై కొందరు దుండగులు దాడికి పాల్పడ్డారు. ఈ హింసాత్మక ఘటనలతో అప్రమత్తమైన యాజమాన్యం, భారతీయ సినిమాల ప్రదర్శనను తాత్కాలికంగా నిలిపివేస్తున్నట్లు ప్రకటించింది.

ఒంటారియోలోని ఓక్‌విల్ నగరంలో ఉన్న 'ఫిల్మ్.కా సినిమాస్' అనే థియేటర్‌లో ఈ సంఘటన చోటుచేసుకుంది. సెప్టెంబర్ 25న ఇద్దరు గుర్తుతెలియని వ్యక్తులు థియేటర్ ప్రవేశ ద్వారానికి నిప్పు పెట్టేందుకు ప్రయత్నించారు. సీసీటీవీ ఫుటేజీ ప్రకారం, వారు ఎర్రటి గ్యాస్ డబ్బాలతో వచ్చి, మండే ద్రవాన్ని పోసి నిప్పంటించారు. అయితే, ఆ సమయంలో థియేటర్ మూసి ఉండటంతో ఎవరికీ ఎలాంటి గాయాలు కాలేదు, పెద్ద ప్రమాదం తప్పింది.

ఈ దాడికి సంబంధించిన వీడియోను థియేటర్ యాజమాన్యం సోషల్ మీడియాలో పంచుకుంది. భారతీయ సినిమాలను ప్రదర్శిస్తున్నందుకే తమపై గతంలోనూ అనేకసార్లు దాడులు, బెదిరింపులు జరిగాయని వారు ఆవేదన వ్యక్తం చేశారు. "ఇలాంటి ఘటనలు మమ్మల్ని కలవరపెడుతున్నాయి. అయినా ప్రేక్షకులకు సురక్షితమైన వాతావరణంలో వినోదాన్ని అందించే మా ప్రయత్నాన్ని ఆపలేవు" అని మొదట పేర్కొన్నారు.

అయితే, వారం రోజుల వ్యవధిలోనే కాల్పులు, నిప్పు పెట్టడం వంటి దాడులు జరగడంతో యాజమాన్యం కీలక నిర్ణయం తీసుకుంది. ప్రేక్షకుల భద్రతను దృష్టిలో ఉంచుకుని, తదుపరి ప్రకటన వెలువడేంత వరకు భారతీయ చిత్రాల ప్రదర్శనలను నిలిపివేస్తున్నట్లు తెలిపింది. ఈ ఘటన స్థానిక భారతీయ సమాజంలో ఆందోళన కలిగిస్తోంది.