పాక్ అదొక్క‌టి చేస్తే చాలు.. టీమిండియాపై ఈజీగా గెల‌వ‌చ్చు: షోయబ్ అక్తర్

ఆసియా కప్ 2025 ఫైనల్‌లో చిరకాల ప్రత్యర్థి భారత్‌తో తలపడేందుకు సిద్ధమవుతున్న పాకిస్థాన్ జట్టుకు ఆ దేశ మాజీ ఫాస్ట్ బౌలర్, రావల్పిండి ఎక్స్‌ప్రెస్ షోయబ్ అక్తర్ కీలక సలహాలు ఇచ్చాడు. టీమిండియాను ఓడించాలంటే ఒకే ఒక్క మార్గం ఉందని, భారత యువ ఓపెనర్ అభిషేక్ శర్మను త్వరితగతిన పెవిలియన్‌కు పంపాలని సూచించాడు. అలా చేస్తే ఫైనల్‌లో పాకిస్థాన్ విజయం ఖాయమని జోస్యం చెప్పాడు.

ఈ టోర్నమెంట్‌లో అద్భుత ఫామ్‌లో ఉన్న అభిషేక్ శర్మను మొదటి రెండు ఓవర్లలోనే ఔట్ చేయడంపై పాక్ బౌలర్లు దృష్టి పెట్టాలని అక్తర్ స్పష్టం చేశాడు. ఒకవేళ అభిషేక్‌ను త్వరగా ఔట్ చేయగలిగితే, టీమిండియా తీవ్ర ఇబ్బందుల్లో పడుతుందన్నాడు. "నా మాట గుర్తుపెట్టుకోండి, మొదటి రెండు ఓవర్లలో అభిషేక్ శర్మ ఔటైతే భారత్ కష్టాల్లో పడుతుంది. అతడు త్వరగా వెనుదిరిగితే, ఆరంభంలో లభించే దూకుడు ఆగిపోతుంది. పరుగులు చేయడానికి వాళ్లు చాలా కష్టపడాల్సి వస్తుంది" అని ఓ టీవీ షోలో అక్తర్ పేర్కొన్నారు.

అంతేకాకుండా, భారత జట్టుకున్న ఆధిపత్యం అనే ఆలోచన నుంచి పాక్ ఆటగాళ్లు బయటకు రావాలని అక్త‌ర్ పిలుపునిచ్చాడు. "టీమిండియా ప్రభావాన్ని పక్కనపెట్టి, దానిని బద్దలు కొట్టండి. బంగ్లాదేశ్‌తో మ్యాచ్‌లో ఎలాంటి దూకుడైన మనస్తత్వంతో ఆడారో, ఫైనల్‌లోనూ అదే కొనసాగించండి. మీరు 20 ఓవర్లు బౌలింగ్ చేయడం కాదు, వికెట్లు తీయడం ముఖ్యం" అని అక్తర్ తన జట్టులో స్ఫూర్తి నింపే ప్రయత్నం చేశాడు.

ఈ సందర్భంగా భారత జట్టు సన్నద్ధతపై కూడా అక్తర్ మాట్లాడాడు. "నాకు గౌతమ్ గంభీర్ గురించి తెలుసు. 'పాకిస్థాన్‌తో ఆడాలంటే మీ అత్యుత్తమ ఆటను ప్రదర్శించాలి' అని అతను తన జట్టుకు కచ్చితంగా చెబుతాడు" అని పేర్కొన్నాడు. ఇక‌, ఈ టోర్నమెంట్‌లో ఇప్పటికే రెండుసార్లు భారత్ చేతిలో ఓడిపోయిన సల్మాన్ ఆఘా సేన, ఫైనల్‌లోనైనా గెలిచి కప్ సాధించాలని పట్టుదలగా ఉంది.