జీఎస్టీ 2.0పై ఏపీ నేతల ప్రశంసలు.. ప్రధాని మోదీకి పవన్ కల్యాణ్ కృతజ్ఞతలు

దేశవ్యాప్తంగా ఈ రోజు అమల్లోకి వచ్చిన జీఎస్టీ 2.0 సంస్కరణలను ఏపీ ఉప ముఖ్యమంత్రి, జనసేన అధినేత పవన్ కల్యాణ్ ప్రశంసించారు. భారత ఆర్థిక వ్యవస్థకు ఇది ఒక శుభదినమని ఆయన అభివర్ణించారు. ఈ నూతన సంస్కరణలను తీసుకొచ్చిన ప్రధాని నరేంద్ర మోదీకి ఆయన ప్రత్యేకంగా కృతజ్ఞతలు తెలిపారు.

"శరన్నవరాత్రుల వేళ ఇది దేశ ఆర్థిక వ్యవస్థకు ఎంతో శుభకరమైన రోజు. ఈ తరం జీఎస్టీ సంస్కరణలను అమలు చేసిన ప్రధాని నరేంద్ర మోదీకి ఏపీ ప్రజల తరఫున హృదయపూర్వక కృతజ్ఞతలు తెలుపుతున్నాను" అని పవన్ కల్యాణ్ సోషల్ మీడియా ప్లాట్‌ఫామ్ 'ఎక్స్'లో పేర్కొన్నారు. 

‘జీఎస్టీ బచత్ ఉత్సవ్’, స్వదేశీ వస్తువులకు మద్దతు వంటి కార్యక్రమాల ద్వారా రైతులు, పరిశ్రమలు, తయారీ రంగం, ఎంఎస్ఎంఈలకు సాధికారత లభిస్తుందని ఆయన అన్నారు. అదే సమయంలో నిత్యావసర వస్తువులు, సేవలు సామాన్యులకు మరింత అందుబాటులోకి వస్తాయని పవన్ తెలిపారు. ఈ సంస్కరణలు ‘వికసిత భారత్ 2047’, ‘ఆత్మనిర్భర్ భారత్’ లక్ష్యాల సాధనలో కీలక ముందడుగు అని ఆయన అభిప్రాయపడ్డారు.

రాష్ట్ర ఐటీ, మానవ వనరుల అభివృద్ధి శాఖ మంత్రి నారా లోకేశ్ కూడా జీఎస్టీ 2.0ను స్వాగతించారు. ప్రధాని నరేంద్ర మోదీ దార్శనిక నాయకత్వంలో తక్కువ పన్ను రేట్లతో సరళమైన విధానం వచ్చిందన్నారు. ఇది మహిళలు, వినియోగదారులు, వ్యాపారులకు మేలు చేస్తుందని పేర్కొన్నారు. గతంలో పన్నుల గందరగోళం ఉండేదని, ఇప్పుడు ప్రతి ఇంటికీ ఇది ‘జీఎస్టీ బచత్ ఉత్సవ్’గా మారిందని లోకేశ్ అభిప్రాయపడ్డారు.

మరోవైపు, కేంద్ర పౌర విమానయాన శాఖ మంత్రి కింజరాపు రామ్మోహన్ నాయుడు మాట్లాడుతూ.. జీఎస్టీ 2.0 ఆత్మనిర్భర్ భారత్‌కు ఆర్థిక శక్తిగా నిలుస్తుందని అన్నారు. ఈ సంస్కరణలు యువత, రైతులు, మధ్యతరగతి కుటుంబాలు, వ్యాపారులకు ఎంతో లబ్ధి చేకూరుస్తాయని తెలిపారు. ముఖ్యంగా విమానయాన రంగంలో డ్రోన్లపై జీఎస్టీని 18%, 28% నుంచి 5 శాతానికి తగ్గించడం ద్వారా డ్రోన్ తయారీ, కార్యకలాపాల్లో యువతకు కొత్త అవకాశాలు లభిస్తాయని ఆయన వివరించారు. అలాగే, మోషన్, ఫ్లైట్ సిమ్యులేటర్లపై జీఎస్టీని మినహాయించడం వల్ల దేశంలో పైలట్ శిక్షణకు గణనీయమైన అవకాశాలు పెరుగుతాయని రామ్మోహన్ నాయుడు పేర్కొన్నారు.