జీఎస్టీ 2.0 వచ్చేసింది.. నవరాత్రి నుంచి తగ్గిన పన్నుల భారం.. ఇవే ఆ వస్తువులు!

దేశ ప్రజలకు కేంద్ర ప్రభుత్వం పండుగ వేళ శుభవార్త అందించింది. ‘జీఎస్టీ 2.0’ పేరుతో వస్తు, సేవల పన్ను (జీఎస్టీ) విధానంలో కీలకమైన మార్పులను నేటి నుంచి అమల్లోకి తెచ్చింది. నవరాత్రి తొలి రోజైన సోమవారం నుంచి ప్రారంభమైన ఈ కొత్త విధానం వల్ల నిత్యావసరాల నుంచి ఎలక్ట్రానిక్ వస్తువుల వరకు వందలాది ఉత్పత్తుల ధరలు గణనీయంగా తగ్గనున్నాయి. ఈ మార్పులతో ప్రతి కుటుంబంపై ఆర్థిక భారం తగ్గనుంది.

కేంద్ర, రాష్ట్ర ప్రభుత్వాలతో కూడిన జీఎస్టీ కౌన్సిల్ తీసుకున్న ఈ నిర్ణయం దేశవ్యాప్తంగా అన్ని వర్గాల వారికి మేలు చేయనుంది. ఈ పన్ను రేట్ల హేతుబద్ధీకరణ వల్ల భారత ఆర్థిక వ్యవస్థకు సుమారు రూ. 2 లక్షల కోట్ల అదనపు ప్రయోజనం చేకూరుతుందని కేంద్ర ఆర్థిక మంత్రి నిర్మలా సీతారామన్ తెలిపారు.

ఏయే వస్తువులపై పన్ను తగ్గిందంటే?
ఈ కొత్త విధానంలో సామాన్యులు రోజూ వినియోగించే వస్తువులకు పెద్దపీట వేశారు. ముఖ్యంగా ఆహార పదార్థాలపై పన్ను భారం తగ్గించారు.

పన్నే లేని వ‌స్తువులు: ప్యాక్ చేసిన పాలు, పన్నీర్, చపాతీలు, పిజ్జా బ్రెడ్ వంటి వాటిపై పన్నును పూర్తిగా రద్దు చేశారు.
నిత్యావసరాలు:  గతంలో 18% పన్ను శ్లాబులో ఉన్న వెన్న, నెయ్యి, డ్రై ఫ్రూట్స్, కాఫీ, ఐస్ క్రీమ్, జామ్‌లు, కెచప్‌లు, బిస్కెట్ల వంటి అనేక వస్తువులను 5% శ్లాబులోకి తీసుకొచ్చారు.
ఎలక్ట్రానిక్స్: పండుగ సీజన్‌ను దృష్టిలో ఉంచుకుని టీవీలు, ఫ్రిజ్‌లు, వాషింగ్ మెషీన్లు, ఏసీల వంటి గృహోపకరణాలపై పన్నును 28% నుంచి 18% శాతానికి తగ్గించారు.
వాహనాలు: చిన్న కార్లు (1200సీసీ లోపు), 350సీసీ లోపు మోటార్‌ సైకిళ్లపై పన్ను 18%గా ఉంటుంది. పర్యావరణ హితమైన ఎలక్ట్రిక్ వాహనాలపై కేవలం 5% పన్ను మాత్రమే విధించనున్నారు.
ఆరోగ్యం, విద్య: ఆరోగ్య, జీవిత బీమా ప్రీమియంలపై పన్నును పూర్తిగా తొలగించారు. అత్యవసర మందులు, వైద్య పరికరాలపై 5% పన్ను వర్తిస్తుంది. పెన్సిళ్లు, పుస్తకాలు, మ్యాప్‌ల వంటి స్టేషనరీ వస్తువులపై పన్ను రద్దు చేశారు.
ఇతర సేవలు, వస్తువులు: నిర్మాణ రంగానికి ఊతమిస్తూ సిమెంట్ మీద పన్నును 28% నుంచి 18 శాతానికి తగ్గించారు. రూ. 7,500 లోపు హోటల్ గదులు, ఎకానమీ విమాన టికెట్లపై 5% జీఎస్టీ ఉంటుంది. అదేవిధంగా జిమ్‌లు, స్పాలు, సెలూన్‌ల సేవలు కూడా చౌక కానున్నాయి.