Manchu Manoj: అక్కకు, తండ్రికి విషెస్ తెలిసిన మంచు మనోజ్

నటుడు మంచు మనోజ్ తన సోదరి మంచు లక్ష్మి, తండ్రి మోహన్ బాబు ప్రధాన పాత్రలలో నటిస్తున్న కొత్త చిత్రం ‘దక్ష’పై ఆసక్తికర వ్యాఖ్యలు చేశారు. ఈ సినిమా ట్రైలర్‌ను చూసిన ఆయన, సోషల్ మీడియా వేదికగా తన స్పందనను పంచుకున్నారు.

‘దక్ష: ది డెడ్లీ కాన్‌స్పిరసీ’ ట్రైలర్ చాలా ఇంటెన్స్‌గా, పవర్‌ఫుల్‌గా ఉందని మనోజ్ పేర్కొన్నారు. తన సోదరి లక్ష్మిని ఇలాంటి ఒక ఉత్కంఠభరితమైన థ్రిల్లర్‌లో చూడటానికి ఎంతో ఆసక్తిగా ఎదురుచూస్తున్నట్లు తెలిపారు. రేపు (సెప్టెంబరు 19) ఈ చిత్రం రిలీజ్ అవుతున్న సందర్భంగా తన తండ్రి మోహన్ బాబుకు, చిత్ర యూనిట్ మొత్తానికి బ్లాక్‌బస్టర్ విజయం దక్కాలని మనోజ్ ఆకాంక్షించారు.

ప్రస్తుతం తెలుగు సినిమా విజయాల పరంపర కొనసాగుతోందని, 'దక్ష' చిత్రంతో ఆ విజయ పరంపర మరింత ముందుకు వెళ్లాలని ఆశిస్తున్నట్లు తన పోస్టులో పేర్కొన్నారు. ఈ చిత్రంలో నటిస్తున్న విలక్షణ నటుడు సముద్రఖని, దర్శకుడు ఎంవీ కృష్ణతో పాటు ఇతర నటీనటులు విశ్వంత్, చిత్ర శుక్ల, సాంకేతిక నిపుణులకు కూడా ఆయన ప్రత్యేకంగా శుభాకాంక్షలు తెలియజేశారు.

కుటుంబ సభ్యుల సినిమాకు మద్దతుగా మంచు మనోజ్ చేసిన ఈ పోస్ట్ ప్రస్తుతం సోషల్ మీడియాలో అందరి దృష్టిని ఆకర్షిస్తోంది.