ఐసీసీ ర్యాంకుల్లో 'టాప్' లేపిన టీమిండియా ఆటగాళ్లు

అంతర్జాతీయ టీ20 క్రికెట్‌లో భారత ఆటగాళ్లు సరికొత్త చరిత్ర సృష్టించారు. ఐసీసీ తాజాగా ప్రకటించిన ర్యాంకింగ్స్‌లో టీమిండియా స్పిన్నర్ వరుణ్ చక్రవర్తి బౌలింగ్ విభాగంలో అగ్రస్థానాన్ని కైవసం చేసుకున్నాడు. దీంతో టీ20 ఫార్మాట్‌లో బ్యాటింగ్, బౌలింగ్, ఆల్‌రౌండర్.. ఇలా మూడు కీలక విభాగాల్లోనూ భారత ఆటగాళ్లే నంబర్ వన్ స్థానాల్లో నిలిచి అరుదైన ఘనతను నమోదు చేశారు.

ఇప్పటికే టీ20 బ్యాటింగ్ ర్యాంకుల్లో అభిషేక్ శర్మ, ఆల్‌రౌండర్ల జాబితాలో హార్దిక్ పాండ్య అగ్రస్థానంలో కొనసాగుతున్న విషయం తెలిసిందే. ఇప్పుడు వరుణ్ చక్రవర్తి కూడా వారి సరసన చేరడంతో టీ20 క్రికెట్‌పై భారత్ పూర్తి ఆధిపత్యాన్ని ప్రదర్శించినట్లయింది. గత కొంతకాలంగా అద్భుత ప్రదర్శన కనబరచడమే వరుణ్ ర్యాంకు మెరుగుపడటానికి కారణమైంది. సీజన్ లో నిలకడగా రాణించడంతో ఏకంగా మూడు స్థానాలు ఎగబాకి ప్రపంచ నంబర్ 1 బౌలర్‌గా నిలిచాడు.

ప్రస్తుతం వరుణ్ చక్రవర్తి 733 పాయింట్లతో అగ్రస్థానంలో ఉండగా, అతని తర్వాత కివీస్ పేసర్ జాకబ్ డఫీ (717), విండీస్ స్పిన్నర్ అకీల్ హుసేన్ (707) వరుసగా రెండు, మూడు స్థానాల్లో ఉన్నారు. భారత బౌలర్లలో జస్‌ప్రీత్ బుమ్రా, రవి బిష్ణోయ్ తర్వాత ఈ 'నెంబర్ వన్' ఘనత సాధించిన మూడో బౌలర్‌గా వరుణ్ రికార్డు సృష్టించాడు. మరోవైపు, గత కొంతకాలంగా జట్టుకు దూరంగా ఉంటున్న రవి బిష్ణోయ్ రెండు స్థానాలు కోల్పోయి 8వ ర్యాంకుకు పడిపోయాడు.

ఈ ఏడాది ఐపీఎల్‌లోనూ అద్భుతంగా రాణించిన వరుణ్, అదే ఫామ్‌ను అంతర్జాతీయ స్థాయిలోనూ కొనసాగిస్తున్నాడు. రాబోయే టీ20 ప్రపంచ కప్‌కు ముందు వరుణ్ చక్రవర్తి ఫామ్‌లోకి రావడం, నంబర్ 1 ర్యాంకు సాధించడం భారత జట్టుకు ఎంతో బలాన్నిస్తుందని క్రీడా నిపుణులు అభిప్రాయపడుతున్నారు.