భద్రాచలంలో స్నానఘట్టాల వద్ద హడలెత్తించిన కొండచిలువ

పుణ్యక్షేత్రమైన భద్రాచలంలో ఆదివారం ఉదయం తీవ్ర కలకలం రేగింది. గోదావరి నది స్నానఘట్టాల సమీపంలోని దుకాణాల వద్ద కొండచిలువ కనిపించడంతో స్థానిక వ్యాపారులు, భక్తులు ఒక్కసారిగా ఉలిక్కిపడ్డారు. భయాందోళనకు గురైన స్థానికులు ఆ కొండచిలువను చంపేశారు.

వివరాల్లోకి వెళితే, స్నానఘట్టాల వద్ద వ్యాపారులు ఉదయం తమ దుకాణాలను తెరుస్తుండగా, ఓ షాపులో నక్కి ఉన్న కొండచిలువను గమనించారు. జనసమ్మర్థం ఉండే ప్రాంతంలో అంత పెద్ద పామును చూసి వారు తీవ్ర భయాందోళనకు లోనయ్యారు. అది ఎవరిపైనైనా దాడి చేయవచ్చనే ఆందోళనతో, ప్రమాదం జరగకముందే దానిని కర్రలతో కొట్టి చంపేశారు. ఈ ఘటనతో ఆ ప్రాంతంలో కాసేపు గందరగోళ వాతావరణం నెలకొంది.

ఇటీవల కురిసిన భారీ వర్షాలకు గోదావరి నదికి వరదలు పోటెత్తిన విషయం తెలిసిందే. ఈ వరద నీటి ప్రవాహానికి ఎగువ ప్రాంతాల నుంచి పెద్ద ఎత్తున చెత్తాచెదారంతో పాటు విష సర్పాలు, కొండచిలువలు వంటివి కొట్టుకొస్తున్నాయని స్థానికులు ఆందోళన వ్యక్తం చేస్తున్నారు. ఈ క్రమంలోనే ఈ కొండచిలువ కూడా జనవాసాల్లోకి వచ్చి ఉంటుందని భావిస్తున్నారు.

వరదల సమయంలో వన్యప్రాణులు సురక్షిత ప్రాంతాల కోసం వెతుకుతూ జనావాసాల్లోకి ప్రవేశించడం సాధారణమని నిపుణులు చెబుతున్నారు. ప్రజలు అప్రమత్తంగా ఉండాలని, అనుమానాస్పదంగా ఏవైనా జంతువులు కనిపిస్తే వాటికి హాని చేయకుండా వెంటనే అటవీశాఖ అధికారులకు సమాచారం అందించాలని సూచిస్తున్నారు. ఈ ఘటన నేపథ్యంలో అధికారులు స్నానఘట్టాల పరిసరాలను పరిశీలించి, తగిన భద్రతా చర్యలు చేపట్టాలని స్థానికులు కోరుతున్నారు.