ఆల్ టైమ్ రికార్డు స్థాయికి చేరిన బంగారం, వెండి ధరలు

దేశంలో బంగారం ధరలు సరికొత్త శిఖరాలను తాకాయి. ఊహించని విధంగా పరుగుతూ 10 గ్రాములు బంగారం ధర రూ. 1.09 లక్షల మార్కును అధిగమించి, ఆల్ టైమ్ గరిష్ఠ స్థాయికి చేరుకుంది. బంగారం బాటలోనే వెండి కూడా దూసుకెళుతూ రికార్డులు సృష్టిస్తోంది. అంతర్జాతీయంగా నెలకొన్న అనిశ్చితి కారణంగా మదుపరులు బంగారం, వెండిని సురక్షితమైన పెట్టుబడులుగా భావించడమే ఈ భారీ పెరుగుదలకు ప్రధాన కారణమని నిపుణులు విశ్లేషిస్తున్నారు.

ఇండియన్ బులియన్ అండ్ జువెలర్స్ అసోసియేషన్ (ఐబీజేఏ) విడుదల చేసిన గణాంకాల ప్రకారం, శుక్రవారం మార్కెట్ ముగిసే సమయానికి 24 క్యారెట్ల బంగారం ధర రూ. 1,09,707 వద్ద స్థిరపడింది. ఈ వారంలో సోమవారం నాటి ధర రూ. 1,08,037తో పోలిస్తే రూ. 1,670 మేర పెరుగుదల నమోదైంది. అదే విధంగా, 22 క్యారెట్ల బంగారం ధర కూడా ఈ వారం ప్రారంభంలో రూ. 98,962 ఉండగా, శుక్రవారం నాటికి రూ. 1,00,492కి చేరింది.

వెండి ధర కూడా గణనీయంగా పెరిగింది. సోమవారం కిలో వెండి ధర రూ. 1,24,413 ఉండగా, శుక్రవారానికి రూ. 3,595 పెరిగి రూ. 1,28,008కి చేరుకుంది. ఈ నెల ప్రారంభం నుంచి వెండి ధర రూ. 1.20 లక్షలపైన కొనసాగుతోండటం గమనార్హం.

అంతర్జాతీయంగా నెలకొన్న రాజకీయ, ఆర్థిక అనిశ్చితులు, అమెరికా టారిఫ్‌లపై నెలకొన్న ఆందోళనల కారణంగా మదుపర్లు సురక్షిత పెట్టుబడుల వైపు మొగ్గు చూపుతున్నారు. దీనికి తోడు, అమెరికా ఆర్థిక వ్యవస్థకు మద్దతుగా ఫెడరల్ రిజర్వ్ వచ్చే వారం వడ్డీ రేట్లను తగ్గించవచ్చనే అంచనాలు బంగారం, వెండి ధరల పెరుగుదలకు మరింత ఊతమిస్తున్నాయి.

ఈ పరిణామాలపై ఎల్‌కేపీ సెక్యూరిటీస్‌కు చెందిన విశ్లేషకుడు జతిన్ త్రివేది స్పందిస్తూ, "యూఎస్ ఫెడ్ 0.50 శాతం వడ్డీ రేటును తగ్గించవచ్చనే అంచనాలు మార్కెట్‌లో బలంగా ఉన్నాయి. ఈ కారణంగానే పసిడి ధరలు పెరుగుతున్నాయి. సమీప భవిష్యత్తులో తులం బంగారం ధర రూ. 1,07,000 నుంచి రూ. 1,12,000 శ్రేణిలో కదలాడవచ్చు" అని అభిప్రాయపడ్డారు. ప్రస్తుత పరిస్థితులు ఇలాగే కొనసాగితే బంగారం, వెండి ధరలు మరింత పెరిగే అవకాశం ఉందని నిపుణులు అంచనా వేస్తున్నారు.