రికార్డుల్లో భారత్‌దే పైచేయి.. అయినా ఆసియా కప్ చరిత్రలో ఆ లోటు తీరలేదు

క్రికెట్ ప్రపంచం మొత్తం ఎంతో ఉత్కంఠగా ఎదురుచూస్తున్న భారత్-పాకిస్థాన్ మ్యాచ్‌కు రంగం సిద్ధమైంది. ఆసియా కప్ 2025లో భాగంగా ఎల్లుండి (ఆదివారం) దుబాయ్ వేదికగా ఈ దాయాదుల సమరం జరగనుంది. ఈ ఏడాది ఏప్రిల్‌లో జరిగిన పహల్గామ్ ఉగ్రదాడి తర్వాత ఈ రెండు జట్లు తలపడటం ఇదే తొలిసారి కావడంతో మ్యాచ్‌పై అంచనాలు తారస్థాయికి చేరాయి. అయితే, ఆసియా కప్ చరిత్రలో ఈ రెండు జట్లకు సంబంధించి ఓ ఆశ్చర్యకరమైన రికార్డు ఉంది. అదేంటంటే ఈ టోర్నీలో భారత్-పాకిస్థాన్ ఇప్పటివరకు ఒక్కసారి కూడా ఫైనల్‌లో తలపడలేదు.

ఆసియా కప్ టోర్నమెంట్ 1984లో ప్రారంభమైనప్పటి నుంచి ఇప్పటివరకు 16 ఎడిషన్లు పూర్తి చేసుకుంది. ఈ సుదీర్ఘ ప్రయాణంలో భారత్, పాకిస్థాన్ జట్లు మొత్తం 19 సార్లు ముఖాముఖి తలపడ్డాయి. వీటిలో టీమిండియా 10 మ్యాచ్‌లలో విజయం సాధించి స్పష్టమైన ఆధిక్యాన్ని ప్రదర్శించగా, పాకిస్థాన్ కేవలం 6 మ్యాచ్‌లలోనే గెలిచింది. మరో 3 మ్యాచ్‌లలో ఫలితం తేలలేదు. కానీ ఈ మ్యాచ్‌లన్నీ గ్రూప్ స్టేజ్, సూపర్ 4 లేదా సెమీఫైనల్ దశల్లో జరిగినవే కావడం గమనార్హం.

ఈ టోర్నీ చరిత్రలో అత్యంత విజయవంతమైన జట్టుగా భారత్ ఎనిమిది సార్లు ఛాంపియన్‌గా నిలిచింది. మరో మూడుసార్లు ఫైనల్ చేరి మొత్తం 11 సార్లు టైటిల్ పోరులో నిలిచింది. అయినా ఒక్కసారి కూడా ఫైనల్‌లో ప్రత్యర్థిగా పాకిస్థాన్‌తో ఆడలేదు. మరోవైపు పాకిస్థాన్ రెండుసార్లు మాత్రమే టైటిల్ గెలుచుకుంది. శ్రీలంక ఆరు టైటిళ్లతో రెండో స్థానంలో ఉంది. టీ20 ప్రపంచకప్, ఛాంపియన్స్ ట్రోఫీ వంటి ఇతర ఐసీసీ టోర్నీల ఫైనల్స్‌లో భారత్-పాకిస్థాన్ తలపడినప్పటికీ, ఆసియా కప్‌లో మాత్రం ఆ అవకాశం ఇంతవరకు రాలేదు.

ప్రస్తుతం జరుగుతున్న 17వ ఎడిషన్‌లో భారత్ తన తొలి మ్యాచ్‌లో యూఏఈపై ఘనవిజయం సాధించి +10.483 రన్‌రేట్‌తో మంచి జోష్‌లో ఉంది. ఈ నేపథ్యంలో ఆదివారం జరగనున్న మ్యాచ్‌పై సర్వత్రా ఆసక్తి నెలకొంది. ఈసారైనా ఈ రెండు జట్లు ఫైనల్‌కు చేరి, చరిత్రలో నిలిచిపోయే టైటిల్ పోరును అభిమానులకు అందిస్తాయో లేదో చూడాలి.