Hyderabad Drugs Racket: హైదరాబాద్‌లో రూ.30 వేల కోట్ల డ్రగ్స్ రాకెట్ గుట్టురట్టు

హైదరాబాద్ శివారు ప్రాంతంలో భారీ డ్రగ్స్ రాకెట్ బట్టబయలైంది. మేడ్చల్ కేంద్రంగా నడుస్తున్న ఓ కంపెనీలో ఏకంగా రూ.30 వేల కోట్ల విలువైన డ్రగ్స్ తయారు చేస్తున్నట్లు మహారాష్ట్ర పోలీసులు గుర్తించారు. పక్కా సమాచారంతో రంగంలోకి దిగిన ఆ రాష్ట్ర పోలీసులు, స్థానిక ఎండీ కంపెనీపై మెరుపుదాడులు నిర్వహించి భారీ స్థాయిలో మత్తు పదార్థాలను స్వాధీనం చేసుకున్నారు.

మేడ్చల్‌లోని సదరు సంస్థలో కొంతకాలంగా చట్టవిరుద్ధంగా డ్రగ్స్ ఉత్పత్తి జరుగుతున్నట్లు మహారాష్ట్ర పోలీసులకు సమాచారం అందింది. దీనిపై సమగ్రంగా దర్యాప్తు చేపట్టిన అధికారులు, హైదరాబాద్ శివార్లలోని ఆ ఫ్యాక్టరీపై దాడి చేశారు. ఈ తనిఖీల్లో అత్యంత ప్రమాదకరమైన ఎక్స్‌టీఎక్స్, ఎక్స్‌టీఎక్స్ మోలీలను గుర్తించి స్వాధీనం చేసుకున్నారు.

అంతేకాకుండా, ఈ డ్రగ్స్ తయారీకి వినియోగిస్తున్న సుమారు 32 వేల లీటర్ల ముడిసరుకును కూడా పోలీసులు సీజ్ చేశారు. డ్రగ్స్ తయారీలో నేరుగా పాల్గొంటున్న 13 మంది నిందితులను అరెస్ట్ చేసినట్లు అధికారులు వెల్లడించారు.